Мінчук накалоў на вілы кацяня і закапаў яшчэ жывым
На вачах у суседзяў мінчук накалоў на вілы кацяня і яшчэ жывым закапаў яго. Шакаваныя відавочцы выклікалі міліцыю, піша газета "СБ. Беларусь сегодня".
Няшчасную жывёлу адкапалі з-пад зямлі і адвезлі ў ветклініку, але было позна. Папярэдні дыягназ, які паставілі ветэрынары, — пералом пазваночніка, унутраны крывацёк, удар унутраных органаў.
У міліцыю пра здзек з жывёлы паведаміў ветэрынар, які аглядаў кацяня. Ён запэўніў, што да здарэння кацяня было зусім здаровае.
Генадзь — сусед, які перадаў пакалечанае кацяня ветэрынару, — кажа, што чалавек, які ўчыніў расправу над жывёлай, ніякага раскаянне не адчуваў. Наадварот, ён бравіраваў сваім учынкам і нават пагражаў суседу. Паколькі пагрозы ад суседа не спыніліся, Генадзь быў вымушаны звярнуцца ў міліцыю з адпаведнай заявай.
Праверкай па факце жорсткага абыходжання з жывёлай займаецца РУУС Савецкага раёна Мінска. Крымінальная адказнасць мінчуку пагражае, калі яго дзеяннях выявяць хуліганскія або нізкія памкненні, карыслівыя мэты, а таксама ўчыненне дзеі ў прысутнасці заведама малалетніх. У іншым разе яму пагражае адміністрацыйная адказнасць — ад 10 да 30 базавых велічынь штрафу (230—690 рублёў) або адміністрацыйны арышт.
