Мінская міліцыя правярае школы — паступілі паведамленні аб выбухоўцы
Паведамленні аб мініраванні школ паступалі і раней, яны не пацвердзіліся / прэс-служба ГУУС Мінгарвыканкама
Адразу ў некалькі мінскіх школ у панядзелак прыехала міліцыя — шукаюць выбуховыя прылады.
Як паведамілі ў прэс-службе ГУУС, міліцыю выклікалі дырэктара школ, якія атрымалі на пошту "паведамленні аб закладзеных выбуховых прыстасаваннях".
"Па кожным факце паведамлення супрацоўнікі міліцыі правядуць праверку", — заявілі ў ГУУС і нагадалі, што такія паведамленні паступалі і раней. Яны не пацвердзіліся.
Чытачы onliner.by паведамілі, што вялікую колькасць міліцыі можна бачыць каля СШ №42 ,СШ № 21, а таксама каля гімназій №29 і 50.
"Дзіця паведаміла, што паступіла інфармацыя аб мініраванні. Усіх дзяцей вывелі, чакаюць МНС", — распавяла мама аднаго са школьнікаў, які вучыцца ў школе № 42 на вуліцы Нёманскай.
TUT.BY у сваю чаргу дапаўняе, што паведамленні аб мінаванні прыйшлі сёння не толькі ў сталічныя школы, але і ва ўстановы адукацыі ў Калінкавічах і Смаргоні.
