Моцны землятрус закрануў курортныя гарады Турцыі і Грэцыі

Уночы на 21 ліпеня ля паўднёва-заходняга ўзбярэжжа Турцыі адбыўся магутны землятрус. Эпіцэнтр падземных штуршкоў знаходзіўся каля курортных гарадоў Бадрум і Мармарыс. 

Па інфармацыі Еўрапейскага міжземнаморскага сейсмалагічнага цэнтра, землятрус адбыўся ў 01:31 па тамтэйшым часе. Эпіцэнтр падземных штуршкоў знаходзіўся ў 12 км на поўдзень ад папулярнага курорта Бадрум, а таксама ў 16 км ад грэцкай выспы Кос і ў 90 км ад выспы Родас. Ачаг землятрусу залягаў на глыбіні ў 10 км.

Землятрус меў не менш за шэсць афтэршокаў магнітудай ад 4,0 да 4,7.

У Бадруме шпіталізавана каля 70 чалавек, таксама паведамляецца пра пацярпелых у турэцкім горадзе Мугла. Не менш як два чалавекі загінулі і больш за 100 пацярпелі на грэцкай выспе Кос.

Таксама паведамляецца, што землятрус прывёў да ўтварэння невялікага цунамі. Па інфармацыі журналістаў The Daily Mail, з прычыны гэтага адбылося падтапленне некаторых гатэляў, размешчаных на ўзбярэжжы горада-курорта Мармарыс.

МЗС Беларусі ўважліва сочыць за сітуацыяй. Звестак пра ахвяры сярод грамадзянаў Беларусі пакуль няма. Пры неабходнасці дыпламаты гатовыя дапамагчы нашым турыстам.