Наступствы бураў і навальніцаў у Беларусі: разбурэнні, аварыі, траўмаваныя
Болей за тысячу населеных пунктаў у Беларусі былі абясточаныя падчас бураў і навальніцаў, якія прайшлі па краіне ў другой палове дня 17 чэрвеня. З-за моцнага ветру, парывы якога дасягалі 26 метраў за секунду, пацярпелі Брэст, Гродна, Мінск і 38 населеных пунктаў у 28 раёнах па заходняй палове краіны.
Вецер пашкодзіў дахі 100 жылых дамоў, 3 аб’ектаў соцкультбыту, 1 вытворчага і 71 сельскагаспадарчага будынка. Вялікая колькасць дрэваў змалананая і паваленая. Пры падзенні дрэваў пашкоджаныя машыны — 184 выпадкі (у Брэсце — 40, у Гродне — 126, у Мінску — 18).
Ёсць пацярпелыя сярод людзей. У Гродне ад падзення ліста шыфера з даху жанчына атрымала траўму нагі і была шпіталізаваная. У Докшыцкім раёне дрэва павалілася на легкавы аўтамабіль падчас руху. Выратавальнікам давялося распілоўваць дрэва і вызваляць з машыны кіроўцу, які, на шчасце, не меў патрэбы ў медыцынскай дапамозе, паведамляе прэс-служба МНС.
Дрэвы падалі таксама на чыгуначныя пуці ў Гродзенскай і ў Віцебскай абласцях — здарылася вымушаная затрымка руху сямі пасажырскіх цягнікоў, якая склала ад 9 хвілін да 2 гадзін.
У Гродзенскім раёне без электрычнасці засталася Скідальская птушкафабрыка — цягам амаль гадзіны яе забяспечвалі святлом праз дызель-генератары.
Бура ў Гродне "задзьмула" вечны агонь і пакасіла касцёльную вежу (фота)
Па Брэсце таксама прайшоўся ураган: паваленыя дрэвы, пашкоджаныя аўто (фота)
