"Небяспечныя хлопцы" Барыс і Рома едуць у новае падарожжа
Рома Свечнікаў ("Рома Едзе") і Барыс Нікалайчык ("Вакол Беларусі на роварах з маторамі") збіраюцца у Мангольскае ралі на… ВАЗе2109 (дзіўна, што не Зэпары). Ці плануюць яны зрабіць з гэтай вандроўкі чарговы дакументальны праект? Чаму Мангольскае Ралі, а не Парыж- Дакар? – распавялі хлопцы у эфіры Еўрарадыё. Вось лепшыя моманты размовы:
Пра Мангольскае Ралі:
"Мы першыя з Беларусі, Украіны і Расіі ўдзельнічаем у гэтым ралі. Мы вырашылі выбраць нешта запамінальнае сярод аўтамабіляў, нешта такое, чаго там яшчэ не было, нешта з нашага рэгіёна. Таму мы выбралі ВАЗ 2109.
Гэта дабрачынная гонка. Кожны з удзельнікаў павінен заплаціць 1000 фунтаў для таго, каб у ёй удзельнічаць. Гэта крута, але ў нас іх яшчэ няма, і мы ў пошуках.
У Мангольскага ралі няма адзінага маршруту. Арганізатары ніякай дапамогі падчас гонкі не аказваюць. Ну, можа, калі табе алігатар руку адкусіць, то тады, магчыма, прыйдуць на дапамогу.
У гэтым ралі не важна, як хутка ты прыедзеш да фінішу. Пераможца нічога не атрымлівае. Тут важна, наколькі насычаным будзе падарожжа. Гэта гонка на выжыванне. Наша мэта ― выжыць і ўгарэць. У добрым сэнсе".
Пра новыя праеты:
"Мы стаміліся ад вялікіх формаў, ад фільмаў, кніг. Вырашылі засяродзіцца на скарацечных момантах. Будзем усё рабіць у дарозе, стрыміць, рабіць нейкія відосы, посціць сторыз. Гэта ўсё будзе адбывацца ў сацсетках".
Пра адчуванні ў дарозе:
"Для мяне быць у дарозе ― гэта лепшыя лекі, спосаб уцячы ад дрыгвы штодзённасці, ад бытавой адказнасці. Гэта мой спосаб жыць.
Кожнае такое глыбокае падарожжа ― гэта такая віпасана, калі ты шмат пакутуеш, дрэнна еш, мала спіш, пастаянна кудысьці рухаешся, але ў цябе ёсць выразная зразумелая мэта. Не слухаеш музыку, не чытаеш кніг, з цябе злятае гэтае інфармацыйнае шалупінне. Ты становішся рэзкім, дакладным і ў нейкі момант дасягаеш прасвятлення, праз слёзы, праз інсайты.
Тут хутка захламляюцца мазгі, ты губляеш вастрыню думкі, пачынаеш засынаць. Але кожны, хто спіць, павінен прачнуцца.
Я не думаю, што дарога для кожнага ― спосаб спраўляцца са сваімі нейкімі праблемамі, перажываннямі. І не ўсім могуць быць патрэбныя такія падарожжы. У кожнага свая праўда".
Пра вяртанне:
"Я вельмі доўга вяртаўся дадому пасля кругасветнага падарожжа. Не фізічна, але духоўна. Амаль год зноў прызвычайваўся да дома, да людзей, да сваякоў. Гэты быў цяжкі перыяд жыцця. Цяжкія ўспаміны".
Пра Радзіму:
Мы для сябе такую ісціну адкрылі пакуль падарожнічалі па Беларусi на роварах: любоў да Радзімы ― гэта заўсёды любоў праз боль.
Цалкам можна паслухаць тут:
