Нецвярозая жанчына па дарозе з Бабруйска ў Клічаўскі раён спыняла цягнікі
Нецвярозая жанчына на Магілёўшчыне спыняла цягнікі. Падчас свайго падарожжа яна заблукала, а правільны накірунак высвятляла выключна ў машыністаў. Пра гэтую кур'ёзную гісторыю распавёў тэлеканал "Беларусь 1".
50-гадовая жанчына вярталася з Бабруйска ў Клічаўскі раён пасля наведвання ўнукаў. Яна "крыху выпіла" і пераблытала дызель-цягнік. Калі зразумела, што не туды едзе, сарвала стоп-кран, выйшла і пайшла далей па чыгунцы. Калі пабачыла іншы цягнік, спыніла яго, каб пацікавіцца ў машыніста, ці правільна яна ідзе. Машыніст выклікаў міліцыянераў, якія склалі на парушальніцу два пратаколы. Жанчыну пасадзілі ў патрэбны цягнік, але на гэтым гісторыя не скончылася. У цягніку яна зноў ужывала алкагольныя напоі і сцэнар паўтарыўся. Зноў з'явіліся міліцыянеры, якія склалі новыя пратаколы. На відэа відаць, што ад іх яна спрабавала збегчы. У выніку дахаты жанчыну суправаджаў сын. Падчас усіх прыгодаў яна не пацярпела.
