Пуціла хоча стаць "паўнавартасным СМІ XXI стагоддзя": што зменіцца?

5 лютага тэлеграм-блогер Сцяпан Пуціла расказаў пра планы стаць "паўнавартасным СМІ XXI стагоддзя". Праект "злёгку абнавіў сайт", у яго штаце з'явіўся першы неананімны супрацоўнік — экс-журналіст Еўрарадыё Раман Пратасевіч. Як і стваральнік тэлеграм-канала Сцяпан Святлоў, ён цяпер жыве ў Варшаве.

За год блог стаў адным з самых уплывовых беларускіх блогераў. Не ў апошнюю чаргу дзякуючы яму дзяржорганы сталі працаваць больш адкрыта. Просты прыклад: блог піша пра НП у вайсковай часці пад Мінскам, і праз тры хвіліны паведамленне пра яе з'яўляецца ў афіцыйным тэлеграм-канале Мінабароны.

Што зараз зменіцца ў рабоце канала? Цяпер трэба будзе яшчэ і сайт дадаць у закладкі?

"Нам хацелася б наймаць супрацоўнікаў, будаваць паўнавартасную рэдакцыю. Прыярытэтам застаецца тэлеграм-канал, — расказвае Еўрарадыё Раман Пратасевіч. — Сайт мы не збіраемся ператвараць у інфармацыйны рэсурс, бо яго могуць вельмі хутка заблакаваць. Для СМІ XXI стагоддзя неабавязкова мець такую ​​цэнтральную пляцоўку".

Што яшчэ зменіцца? Блогер заяўляе, што плануе адысці ад "жаўцізны і адыёзнасці стылю". Якраз над гэтым працуе Раман. У планах таксама дадаць новыя рубрыкі, часцей выкарыстоўваць беларускую мову і стварыць праекты культурна-грамадскай тэматыкі.

"Пераход ад блога да паўнавартаснага СМІ — гэта працэс няпросты і працяглы. У нас няма на гэта грантаў ці якога-небудзь іншага фінансавання. Хоць хацелася б", — адказвае Пратасевіч ананімным тэлеграм-каналам, якія хорам заявілі, што блогер пашыраецца, атрымаўшы грант "пад прэзідэнцкія выбары".

Карацей, самаму папулярнаму беларускаму тэлеграм-каналу стала цесна ў выбраным фармаце. Але як з яго выбрацца, падобна, пакуль не разумеюць нават яго аўтары. Таму пакуль што самае прыкметнае змяненне ў рабоце блогера — новае лога.

Чтобы следить за важными новостями, подпишитесь на канал Еврорадио в Telegram.

Мы каждый день публикуем видео о жизни в Беларуси на Youtube-канале. Подписаться можно тут.