Па справе ашмянскіх мытнікаў пракурор папрасіў да 12,5 года калоніі
На судзе над групай ашмянскіх мытнікаў пракурор 29 чэрвеня агучыў прапановы дзяржаўнага абвінавачання — ад 3 гадоў абмежавання волі ў папраўчай установе да 12,5 гадоў калоніі ўзмоцненага рэжыму, перадае БЕЛТА. Мытнікаў вінавацяць у арганізацыі шырокамаштабнай схемы ўхілення ад выплаты мытных плацяжоў.
Для падсуднага Юрыя Кавальчука пракурор папрасіў 7 гадоў пазбаўлення волі ў калоніі ўзмоцненага рэжыму з канфіскацыяй маёмасці. Таксама прапануецца пазбавіць яго права займаць пасады, звязаныя з выкананнем арганізацыйна-распарадчых абавязкаў і выкананнем функцый прадстаўніка ўлады, тэрмінам на 5 гадоў.
Пракурор папрасіў суд спагнаць з абвінавачаных на карысць дзяржавы сумы нанесенай шкоды. Агучаныя сумы вар'іраваліся ад 3,3 тысячы долараў да больш чым 124 тысячы долараў.
Агулам па справе праходзяць падсуднымі 16 чалавек. 11 з іх знаходзяцца пад вартай, астатнім прызначаны хатні арышт і падпіска аб нявыездзе. 12 чалавек вінавацяць у атрыманні хабару ў асабліва буйным памеры. Астатніх акрамя таго вінвацяць у дачы хабару і бяздзеянні службовай асобы.
Паводле версіі абвінавачання, група мытнікаў за хабар бесперашкодна прапускала буйныя партыі тавараў праз дзяржаўную мяжу Беларусі ў пункце пропуску "Каменны Лог". Сумы хабару складалі ад 250 да 3 тысяч долараў у залежнасці ад колькасці грузаў. Адзін з удзельнікаў злачыннай групы за штомесячнае ўзнагароджанне ў 1000 долараў прыкрываў злачынную дзейнасць групы, паведамляючы пра планаваныя праверкі з боку Дзяржаўнага мытнага камітэта.
