Пад Масквой ноччу зноў збілі беспілотнік
Падчас аднаго з папярэдніх нападаў на Маскву пацярпеў будынак бізнес-цэнтра / агенцтва "Москва"
У Маскоўскай вобласці мінулай ноччу збілі "варожы беспілотнік", распавёў у сацсетках мэр расійскай сталіцы Сяргей Сабянін. Разбурэнняў і пацярпелых, па яго словах, няма. Паводле звестак расійскага Мінабароны, беспілотнік спрабаваў атакаваць аб'екты ў Маскоўскай вобласці. Для яго знішчэння былі задзейнічаныя сродкі СПА.
Гэта ўжо трэцяя атака беспілотнікаў на Маскву і вобласць за апошні месяц. 24 ліпеня два дроны патрапілі ў нежылыя будынкі ў сталіцы, а 4 ліпеня ў Маскоўскай вобласці і Новай Маскве збілі і задушылі сродкамі радыёэлектроннай барацьбы яшчэ пяць беспілотнікаў.
Нагадаем, Расія 24 лютага 2022 года напала на Украіну. З тых часоў бамбіць і разбурае гарады не толькі па лініі фронту, але і ў тыле. Пасля завяршэння збожжавай здзелкі 17 ліпеня, да прыкладу, Расія амаль кожную ноч разбурае Адэсу, дзе размешчаны порт, з якога выходзілі суда са збожжам. Напярэдадні Адэсу наведаў прэзідэнт Украіны Уладзімір Зяленскі.
