Падчас візіту ў Чэхію ў Сахашчыка скралі дзве сумкі з асабістымі дакументамі

Прадстаўнік па пытаннях абароны і нацыянальнай бяспекі Аб'яднанага пераходнага кабінета Беларусі, кіраўнік Дэпартамента нацбяспекі Валерый Сахашчык паведаміў пра тое, што падчас візіту ў Чэхію (ён сустракаўся з еўрапейскімі палітыкамі, якія займаюцца пытаннямі абароны) ў яго скралі дзве сумкі з асабістымі дакументамі (яны звязаны з будаўнічым бізнесам Сахашчыка). Яны знаходзіліся ў аўтамабілі, які быў узламаны невядомымі.

"Аналіз здарэння, праведзены на месцы чэшскімі спецыялістамі, паказвае на працу спецслужбаў, — піша Сахашчык. — Відавочна, што КДБ пачынае нервавацца, а там, дзе нервы, непазбежна з'яўляюцца і памылкі".

Сахашчык — былы камандзір 38-й асобнай дэсантна-штурмавой брыгады ў Брэсце. Ён жыве ў Польшчы. Неаднаразова звяртаўся да беларускіх вайскоўцаў, заклікаў іх не ўдзельнічаць у вайне супраць Украіны.