Палата прадстаўнікоў Кангрэса ЗША зноў не здолела выбраць спікера

Палата прадстаўнікоў Кангрэса ЗША не здолела выбраць спікера. За тры дні былі зробленыя 11 спробаў. Але Кевін Макарці не можа сабраць неабходнай колькасці галасоў (218). У пятніцу будзе чарговая спроба.

Як паведамляе "Голас Амерыкі", падчас апошняга галасавання ў спіс была ўнесена кандыдатура экс-прэзідэнта Дональда Трампа, але за яго прагаласаваў толькі адзін кангрэсмен. Рэспубліканцы маюць у Палаце прадстаўнікоў нязначную перавагу (222 кангрэсмены-рэспубліканцы супраць 212 дэмакратаў).

З-за немагчымасці выбраць спікера Палата прадстаўнікоў не можа выконваць свае функцыі. Падобнай сітуацыі не было з 1859 года, калі для абрання спікера спатрэбіліся 44 туры галасавання. А ў 1923-м спатрэбіліся 10 тураў.