Пошукі новага Гары Потэра і ўцёкі жывёл з заапарка ў Нігерыі — #ІхНоравы

10/09/2024 - 16:13

Міжнародныя навіны / @rubanau_collage

Абвешчаны кастынг на новых акцёраў для серыяла па "Гары Потэры". Шукаюць галоўных герояў — Гары, Рона і Герміёну.

Калі вы раптам жывяце ў Вялікабрытаніі ці Ірландыі, а ваша дзіця неверагодна артыстычнае, то чаму б не паспрабаваць? Часу на роздумы — да 31 кастрычніка.

Больш падрабязна чытайце ў нашай штодзённай міжнароднай рубрыцы.

Германія ўзмацняе кантроль на сухапутных межах

Германія з 16 верасня ўводзіць узмоцнены кантроль на сваіх сухапутных межах з-за нелегальных мігрантаў. Ён будзе дзейнічаць паўгода, прычым улады не выключаюць яго падаўжэння, піша Euronews.

Кіраўнік нямецкага МУС Нэнсі Фэзер заявіла, што новыя меры на межах "абароняць ад сур'ёзнай небяспекі, якую ўяўляюць ісламісцкі тэрарызм і трансгранічная злачыннасць".

Новыя памежныя праверкі, мяркуючы па ўсім, закрануць усіх, хто будзе перасякаць сухапутную мяжу Германіі ў любым кірунку, што можа выліцца ў заторы на аўтатрасах і затрымкі для падарожнікаў на чыгунцы.

Па сушы Германія мяжуе з дзевяццю краінамі: Даніяй, Нідэрландамі, Бельгіяй, Люксембургам, Францыяй, Швейцарыяй, Аўстрыяй, Чэхіяй і Польшчай.

Такія меры прынялі пасля трайнога забойства ў горадзе Золінген. Падазраваны — сірыец — быў нелегальным мігрантам, якому адмовілі ў прытулку і збіраліся дэпартаваць яшчэ год таму.

Бежанец з Ірана пацярпеў ад гвалту з боку шасці мужчын у Германіі

30-гадовы Амір Т. жыў у будынку бровара ў нямецкім Ізерлоне.

Да раніцы суботы ў яго гасцявалі сябры, якія начавалі ў доме. Увечары ён застаўся адзін, і да яго раптоўна заявіліся шэсць чалавек у масках, піша BILD.

"Яны забралі мой мабільны тэлефон і запатрабавалі, каб я дэактываваў свой профіль у Instagram і выдаліў усё, што выкладаў у Інтэрнэце супраць іранскага рэжыму", — расказаў Амір.

Калі ён адмовіўся гэта зрабіць, яго збілі, а затым звязалі рукі і ногі кабельнымі сцяжкамі. Наступныя паўгадзіны злачынцы гвалтавалі хлопца рознымі прадметамі і неаднаразова білі па галаве і твары. Сведкі, пачуўшы адчайныя крыкі ахвяры, выклікалі паліцыю.

Чатыры злачынцы знаходзяцца пад вартай, яны грамадзяне Нідэрландаў і Даніі з персідскімі каранямі. Яшчэ двое — у бягах. Як паведамляе Der Spiegel, мужчыны — прыхільнікі іранскага рэжыму і хацелі зняважыць сваю ахвяру.

Згвалтаванне яны здымалі на камеру.

З заапарка ў Нігерыі ўцяклі дзікія жывёлы

Супрацоўнікі заапарка на паўночным усходзе Нігерыі пацвердзілі, што некаторыя дзікія жывёлы ўцяклі са сваіх вальераў пасля вельмі вялікай паводкі.

Алі Данбест, кіраўнік заапарка Санда К'ярымі, расказаў BBC, што не ведае дакладна, колькі жывёл знаходзіцца на волі, цяпер вядуцца іх пошукі.

"Нам удалося злавіць толькі страуса, а яшчэ нам тэлефанавалі і казалі, што ў іншым месцы бачылі кракадзіла, але мы не можам туды дабрацца з-за паводкі", — сказаў ён.

Дырэктар заапарка патлумачыў, што паводка пашкодзіла сцены — гэта і дазволіла жывёлам уцячы, аднак нападаў на людзей пакуль не фіксавалася.

Паводле звестак Нацыянальнага агенцтва па надзвычайных сытуацыях Нігерыі, у выніку магутнай паводкі загінула больш за 170 чалавек, а дзясяткі тысяч былі вымушаныя пакінуць свае дамы.

Абвешчаны кастынг на новага Гары Потэра

Амерыканскі канал HBO шукае новых Гары, Герміёну і Рона для новага серыяла пра "Гары Потэра". Кастынг абвясцілі для жыхароў Вялікабрытаніі і Ірландыі ва ўзросце ад 9 да 11 гадоў.

Адзначаецца, што кандыдатаў будуць разглядаць незалежна ад іх этнічнай прыналежнасці, полу і расы.

Да заяўкі неабходна прымацаваць два відэа. У першым патрэбна прачытаць кароткі верш або празаічны ўрывак — але не з "Гары Потэра". Працягласць відэа павінна складаць не больш за 30 секунд.

А ў другім кандыдат павінен расказаць пра сябе: назваць дату нараджэння, рост і месца пражывання, а таксама апісаць любога члена сям'і, сябра альбо хатнюю жывёлу. У абодвух відэа трэба гаварыць са сваім родным акцэнтам.

Тэрмін падачы заявак — да 31 кастрычніка. У аб'яве аб кастынгу таксама гаворыцца, што здымкі пройдуць у Вялікабрытаніі ў 2025-2026 гадах. Дату выхаду серыяла пакуль не вызначылі.