Прэзідэнткай Славеніі абраная Наташа Пірц-Мусар

У другім туры прэзідэнцкіх выбараў у Славеніі перамагла Наташа Пірц-Мусар, паведамляе Нацыяльная выбарчая камісія краіны.

Яна набрала 53,86% галасоў, яе сапернік Анжы Логар — 46,14%.

Наташа Пірц-Мусар — першая жанчына на прэзідэнцкай пасадзе ў Славеніі. На сваю пасаду яна павінна ўступіць 23 снежня, калі скончыцца пяцігадовы мандат цяперашняга прэзідэнта.

Наташа Пірц-Мусар не ўваходзіць ні ў якую партыю, але прадстаўляе левацэнтрысцкія погляды. Таксама яна вядомая як экс-адвакатка Дональда і Меланіі Трампаў.

Славенія з'яўляецца парламенцкай рэспублікай, таму прэзідэнт мае пераважна прадстаўнічыя функцыі.