Пяскоў заявіў, што не мае звестак наконт прыбыцця Прыгожына ў Беларусь

Крэмль не мае звестак аб прыбыцці ў Беларусь заснавальніка ПВК "Вагнер" Яўгена Прыгожына. Пра гэта заявіў прэс-сакратар Пуціна Дзмітрый Пяскоў.

"Тут я не валодаю ніякімі данымі і нічога не магу вам сказаць", — цытуе ТАСС словы Пяскова ў адказ на адпаведнае пытанне.

Таксама прадстаўнік Крамля заявіў, што Уладзімір Пуцін і Аляксандр Лукашэнка "абменьваюцца думкамі і каардынуюць дзеянні літаральна кожны дзень".

Як распавядала Еўрарадыё, зранку 27 чэрвеня бізнес-джэт Прыгожына сеў на вайсковым аэрадроме ў Мачулішчах пад Мінскам. Напярэдадні ў тг-каналах з'яўлялася інармацыя, быццам Прыгожына заўважылі ў мінскім гатэлі Green City. Але адміністрацыя гатэля не змагла пацвердзіць журналістам, што заснавальнік ПВК "Вагнер" спыніўся ў іх.

Пераезд Прыгожына ў Беларусь называўся ўмовай для спынення крымінальнай справы супраць яго за спробу ўзброенага мяцяжу.