Расія дасць Беларусі адтэрміноўку на пагашэнне крэдыту, выдадзенага на БелАЭС

Расія, відаць, зноў пагадзілася адтэрмінаваць пачатак беларускіх выплат па крэдыце на будаўніцтва БелАЭС. Апублікаваны адпаведны праект пратакола, які ўжо ўхваліў прэм'ер-міністр РФ Міхаіл Мішусцін. Пратакол уносіць змены ў беларуска-расійскае пагадненне ад 2011 года. Там ішла размова пра вылучэнне Расіяй крэдыту ў памеры $ 10 млрд на будаўніцтва Беларускай АЭС. Праект пратакола прадугледжвае, што пагашэнне крэдыту пачнецца не пазней за 1 красавіка 2024 года. Згодна з ранейшымі дамоўленасцямі, Беларусь павінна была пачаць аддаваць доўг з красавіка гэтага года.

Акрамя таго, у дакуменце запісана, што ўсе плацяжы па крэдыце будуць праводзіцца ў расійскіх рублях. Адзначым, што пратакол яшчэ мусяць падпісаць абодва бакі.

Дадамо, што плацяжы па гэтым крэдыце ссоўваюцца ўжо не ў першы раз. Першапачаткова Беларусь павінна была пачаць выплачваць крэдыт з 1 красавіка 2021 года. Але тады беларускія чыноўнікі ўгаварылі расійскія ўлады адтэрмінаваць выплаты на два гады — да 1 красавіка 2023-га. Гэта тлумачылі падзеннем сусветных коштаў на нафту і газ, а таксама пераносам тэрміну ўводу ў эксплуатацыю двух энэргаблокаў АЭС. Што зрабілася прычынай новага пераносу тэрмінаў, не паведамляецца.