Алег Хаменка вярнуўся да казак. Толькі гэтым разам для дарослых

04/11/2011 - 12:27

Алег Хаменка, аўтар праекту “Беларускія народныя казкі для дзетак”, распавёў казку для дарослых. Цягам 50 хвілін аматары казак слухалі гісторыю пра салдата, які рушыў дадому, адслужыўшы 25 гадоў у войску, але так і не пабачыў сваіх бацькоў. На яго долю выпалі дзіўныя выпрабаванні, прыгоды і сустрэча з панамі-лекарамі, якая змяніла яго жыццё.

Алег Хаменка: “Пасядзелі яны, нешта пагаварылі. А тады той, што па левай руцэ сядзеў, падышоў і дунуў — і царская дачка зраслася. Тады дунуў другі раз — і быццам бы яна задыхала. А тады дунуў трэці раз — і паднялася яна вясёлая гэткая, была яна прыгожая, а стала яшчэ прыгажэй”.

Наглядзеўшыся на цуды дактароў, хітры салдат вырашыў і сам “лячыць” людзей і такім чынам зарабляць сабе на жыццё.

Алег Хаменка: “Дзе тая дарога дадому? Дзе той шлях? Не тое што збіўся — увогуле пазабыўся, ці ісці яму куды трэба. А потым яго яшчэ перанялі, абрабавалі, і грошай не засталося. І таму, што здарожыўся, ён зайшоў увогуле ў нейкае каралеўства. Але прыйдзе ў які двор заезны, і гаворыць, што ён лекар”.

Хітрасць ды сквапнасць новаспечанага “лекара” да дабра яго не давяла: праз здзелку са смерцю, падман самога Бога ды гульні з чарцямі застаўся герой казкі адзін, ні жывы, ні мёртвы, паміж небам і зямлёй. Абяцаныя Алегам Хаменкам сто сэнсаў прымусілі слухачоў задумацца.

Наведвальніца: “Як у любой казцы, ёсць заўсёды нейкае адкрытае пытанне, ёсць рэчы, якія зразумелыя… Гэта казка. Яна заўсёды нечаму вучыць”.

Еўрарадыё запыталася ў наведвальнікаў “Казачнай акустыкі” пра іх любімыя казкі. Самы юны слухач Раман, які смела праслухаў крывавую казку пра салдата, любіць казкі Андэрсана і Шарля Перо.

Раман: “У мяне самая любімая казка — гэта “Крэсіва”, яна мне вельмі падабаецца. Яшчэ я люблю казку “Чырвоны капялюшык”.

Вікторыя, маці Рамана, аддае перавагу англійскім казкам.

Вікторыя: “Ёсць англійскі пісьменнік, на жаль, я зараз забыла на яго імя, але я вельмі люблю гэтыя казкі чытаць дзецям. У іх ёсць філасофія, што ў жыцці любыя праблемы можна вырашыць дастаткова лёгка, і не трэба гэтыя праблемы ствараць. І ўвогуле, па жыцці да ўсяго трэба ставіць з лёгкасцю і па-філасофску”.

Бацька Рамана, Дзяніс, любіць беларускія народныя казкі.

Дзяніс: “Звычайна мне бацька чытаў “Іван — сялянскі сын”. Па ўсім відаць, у кожнай сям’і была такая таўшчэзная кніжка “Беларускія народныя казкі”, вось адтуль, мне, пэўна, болей і запомнілася. А яшчэ таксама мне запомнілася казка ў выкананні Алега Хаменкі “Бык і ваўкі”. Вось гэтую казку вельмі люблю: яна простая і з такім простым філасофскім народным гумарам".

Дапамагаў Алегу Хаменку баяць казку пра салдата гурт “Палац”. Праўда, музыкі гралі крыху незвычайную для сябе музыку — блізкія да традыцыйных вальсы, маршы, полькі. Хочацца спадзявацца, што любімая казка Алега Хаменкі аднойчы сапраўды стане спектаклем ці мультфільмам. А гурту “Палац” — параіць запісаць альбом полек, вальсаў ды маршаў: старадаўняя танцавальная музыка, адаптаваная для сучаснікаў, нам ой, як патрэбна!