Шэнгенскія візы падаражаюць да 80 еўра, але стануць больш даступнымі
14 сакавіка на сайце Еўракамісіі з’явілася паведамленне пра меркаваныя змены візавых правілаў ЕС. Паводле інфармацыі ЕК, прапанаваная рэформа “зробіць працэдуру атрымання віз для законапаслухмяных вандроўнікаў лягчэйшай і хутчэйшай”. Калі рэформа візавых правілаў будзе завершаная, не ўдакладняецца, але ўжо вядома, што кошт візы вырасце: консульскія зборы мяркуецца павысіць з 60 да 80 еўра.
І нават калі перамовы паміж Мінскам і Бруселем аб змяншэнні кошту віз да 35 еўра паспяхова завершацца, таннага “шэнгену” нам не ўбачыць. Такое меркаванне ў размове з Еўрарадыё выказвае палітолаг Дзяніс Мельянцоў.
Мельянцоў: “Калі кошт шэнгенскай візы павышаецца да 80 еўра, то атрымліваецца, што кошт для нас, у тым выпадку, калі будзе падпісаная дамова аб змяншэнні кошту віз, усё адно будзе вышэйшы на гэтыя 20 еўра. А калі дадаць сюды яшчэ розныя візавыя цэнтры, якія бяруць дадатковую аплату, то ў выніку мы атрымаем тыя ж 60 еўра”.
Па словах палітолага, “справа з Еўракамісіяй у нюансах”, і магчыма, што ў выніку перамоў беларускі бок здолее нечага дамагчыся для беларусаў. Тым не менш, кажа Дзяніс Мельянцоў, ініцыятыва Еўракамісіі дадасць дадатковы пункт у перамовы паміж Беларуссю і Еўрасаюзам.
