Сілавік і суддзя атрымалі "рытуальныя кошыкі як атрыбуты пахавальнай цырымоніі"
У суд перадалі крымінальную справу, распачатую ў дачыненні 40-гадовага жыхара Стаўбцоўскага раёна. Мужчыну будуць судзіць за пагрозы міліцыянеру і суддзі. Як паведамляе прэс-служба Генпракуратуры, ён "дзейнічаў у групе асобаў". У чэрвені ўначы каля дома міліцыянера і па месцы жыхарства суддзі з'явіліся "рытуальныя кошыкі як атрыбуты пахавальнай цырымоніі". Да іх былі прыкладзены запіскі "з пагрозамі прымянення гвалту".
Абвінавачаны сваёй віны не прызнае. Ён па-ранейшаму знаходзіцца пад вартай.
Падобныя акцыі ў дачыненні сілавікоў, чыноўнікаў, суддзяў пачалі адбывацца ў розных рэгіёнах краіны пасля прэзідэнцкіх выбараў 2020 года.
