Стала вядома, чаму Беларусь і Расія не падпісалі пагадненне аб візах

Стала вядома, чаму Беларусь і Расія не падпісалі 13 снежня пагадненне аб узаемным прызнанні віз. Анансавалася, што гэты дакумент падпішуць на пасяджэнні Саўміна саюзнай дзяржавы ў Брэсце. Аднак беларускі прэ\м'ер-міністр Сяргей Румас паведаміў, што яшчэ не завершаныя "унутрыдзяржаўныя працэдуры ў Беларусі". Відаць, для расійскага прэм'ера Дзмітрыя Мядзведзева гэта стала нечаканасцю. Ён, дарэчы, учора прапанаваў Беларусі перайсці на расійскі рубель. На яго "інтэграцыйныя сцэнары" ў пятніцу на сустрэчы з прадстаўнікамі расійскіх СМІ адказаў Аляксандр Лукашэнка. Таксама беларускі кіраўнік патлумачыў, што ж здарылася з пагадненнем па візах.

"З саюзным шэнгенам праблем не будзе, проста гэты дакумент пакуль не прайшоў унутрыдзяржаўныя працэдуры, — фактычна паўтараў словы Румаса Лукашэнка. — Але самае галоўнае — я яго яшчэ пакуль не бачыў. Так ужо здарылася, рэдка бывае, што абмяркоўваецца дакумент на саюзным саўміне, а ўзяць яго няма дзе. Ён толькі ўчора ўвечары да мяне на разгляд паступіў".

Аляксандр Лукашэнка паабяцаў, што падпісанне дакумента адбудзецца і што пажаданні абодвух бакоў у ім улічаныя. Ён прадугледжвае, што замежнікі, у якіх ёсць беларуская віза, змогуць трапіць у Расію і знаходзіцца на яе тэрыторыі да заканчэння тэрміну яе дзеяння. Такія ж правілы будуць дзейнічаць у Беларусі для замежных грамадзян, якія маюць расійскую візу, інфармуе "Беларусь сегодня".