Структура ААН заклікала Мінск не падвяргаць рызыцы жыццё мігрантаў
Мігранты на беларуска-польскай мяжы / БЕЛТА
Пазбягаць дзеянняў, якія могуць несці рызыкі для жыцця людзей — з такім заклікам звярнулася Упраўленне вярхоўнага камісара ААН па справах бежанцаў (УВКБ) да афіцыйнага Мінска. Заява размешчана ў Twitter структуры.
Відэакадры з беларуска-польскай мяжы "выклікаюць глыбокую занепакоенасць", гаворыцца ў паведамленні УВКБ.
"Мы неаднаразова заяўлялі, што выкарыстанне бежанцаў і мігрантаў для дасягнення палітычных мэтаў з'яўляецца непрымальным. Цяпер настаў час дзейнічаць — мы заклікаем Беларусь пазбягаць рызыкі для жыцця", — падкрэслілі аўтары дакумента.
Images from Belarus-Poland border are deeply concerning. We have repeatedly said using refugees & migrants to achieve political ends is unacceptable & must stop. It’s time to act now – we call on Belarus to avoid putting lives at risk.
— UNHCR, the UN Refugee Agency (@Refugees) November 8, 2021
Заява стала рэакцыяй на ўчорашнія падзеі на беларуска-польскай мяжы, куды прыйшлі тысячы мігрантаў у надзеі трапіць на тэрыторыю Польшчы. Група мужчын паспрабавала пры дапамозе бярвення і кусачак прарваць металічную агароджу на мяжы, але польскі бок іх не прапусціў. Мігранты разбілі лагер у лесе ўздоўж мяжы.
Напярэдадні стала вядома, што ЕС гатовы паскорыцца з пашырэннем санкцый супраць Беларусі ў сувязі з сітуацыяй з мігрантамі. Аб гэтым заявіла кіраўнік Еўракамісіі Урсула фон дэр Ляйен.
Пра намер працягнуць ціск на Аляксандра Лукашэнку заявілі і ЗША. У Вашынгтоне занепакоеныя паведамленнямі з беларуска-польскай мяжы. ЗША "рашуча асуджаюць" выкарыстанне мігрантаў уладамі Беларусі "ў палітычных мэтах", заявіў напярэдадні кіраўнік прэс-службы Дзярждэпартамента Злучаных Штатаў Нед Прайс.
