У аптэчках беларускіх салдат — хлам з СССР, а не тое, што паказваюць Лукашэнку

21 кастрычніка Лукашэнку паказалі навінкі айчыннага ваенпрама і заадно прадэманстравалі медыцынскія аптэчкі. Маўляў, глядзіце, якія ў нас сучасныя медкамплекты для байцоў.

Укамплектавалі вайскоўцаў новымі аптэчкамі ад Піневіча ці не — складана сказаць. А пакуль што ёсць падставы меркаваць, што ў сумках беларускіх салдат і вайсковых медыкаў да гэтага часу ляжыць савецкі хлам.
 

Бінты з часоў перабудовы

Палітычны аналітык Ігар Тышкевіч публікуе актуальнае фота вайсковай аптэчкі, знойдзенае ім у тг-канале беларускіх сілавікоў. "Байцы УСУ, НГ і іншых структур. Прашу, надта гучна не смейцеся", — піша Ігар.

Еўрарадыё стала цікава, адкуль узялася такая рэакцыя. Здавалася б, нічога незвычайнага: на фота беларуская "аптэчка першай дапамогі індывідуальная", АПДІ. Мяркуючы па яе складзе, яна ёсць скапіяваным аналагам савецкай АІ-2 і расійскай АІ-4. Гэта "аптэчкі суднага дня", прызначаныя для самадапамогі ў выпадку тэхнагеннай катастрофы або прымянення зброі масавага паражэння, у тым ліку ядзернай.

Але "гвозд праграмы" — не АПДІ, а пост, які тг-канал беларускіх сілавікоў выклаў перад гэтым.

"На фота наборы медыцынскіх сродкаў для санінструктара і санітара-стралка, а таксама аптэчка першай дапамогі індывідуальная, якія дэманстраваліся сёлета на ўсеагульным аглядзе", — паведамляе паблік.

Як відаць, гэта таксама паказушны стэнд, толькі ўжо дзесьці на мерапрыемстве, арганізаваным вайскоўцамі для цывільных. Вядома, там няма правяральнікаў і ўжо тым больш няма Лукашэнкі. Карацей, выклалі ўсё як ёсць.

Беднасць "медзабеспячэння" здзіўляе. На фота мы бачым старыя нязручныя брызентавыя сумкі, пратэрмінаваныя (яшчэ з савецкіх часоў!) бінты, вату, індывідуальныя перавязачныя пакеты, жгуты і медыцынскія хусткі. Усе гэтыя сродкі — равеснікі перабудовы і вайны ў Афганістане. З сучаснага заўважаныя толькі супрацьхімічны пакет ІСП-11 і кроваспыняльны турнікет.

Татальная некампетэнтнасць

Заўважце, што нам паказваюць не проста змесціва аптэчкі для байца, а пашыраны камплект для санінструктара — чалавека, які абавязаны ўмець аказаць кваліфікаваную першую і неадкладную дапамогу параненаму салдату. Але мы не бачым нават базавых сродкаў, якія павінны быць у спецыяліста.

Няма сістэм для пералівання раствораў (як і саміх раствораў). Няма анатамічнага заціску і хірургічных нажніц — замест іх "ад балды" пакладзены канцылярскія (!) нажніцы. Няма шыўнага матэрыялу, стэрыльных пальчатак, шпрыцаў, скальпеля са зменнымі лёзамі, гемастатыку (сродку, які мае кроваспыняльны эфект). Няма хірургічных іголак і нават банальнай упакоўкі ёду або перакісу вадароду. А акрамя сродкаў, прызначаных для дапамогі параненаму байцу, павінен быць яшчэ шырокі спектр таблетак на ўсе выпадкі — ад антыбіётыкаў да болепатольных.

Карацей, з аснашчанасцю беларускага санінструктара ўсё ясна. Ці варта гаварыць пра кампетэнтнасць тых, хто не пасаромеўся гэта ўсё прадэманстраваць.
 

Супераптэчка ад Піневіча

Зусім іншая рэч аптэчкі, якія міністр аховы здароўя Піневіч паказвае Лукашэнку. Тут усё, што трэба не толькі радавому байцу, але і палявому медыку.

Тут табе і новы паветравод Гведэла, і спецыяльныя нажніцы, і фізраствор, і гемастатык, і бандажы для траўмаў, кроплі для вачэй, нават забугорны аклюзійны пластыр "Сhest seal vented". Шпрыцы, таблеткі, турнікеты — усё ёсць. І запакавана ў зручны несэсар, а не ў старую савецкую брызентавую сумку.

Хтосьці можа запярэчыць: дык усе гэтыя савецкія прыбамбасы клалі проста так, для справаздачнасці. Насамрэч, маўляў, у нашых войскаў аптэчкі такія, як Піневіч паказаў. Ну або падобныя да іх.

Хочацца спытаць: навошта тады выстаўляць некамплект і старызну на ўсеагульны агляд? Навошта наогул гэта захоўваць у падраздзяленнях? Навошта ўводзіць людзей у зман, паказваючы для Лукашэнкі адно, а для беларусаў іншае?

Выходзіць, што ўсё гэта паказуха, якая ніяк не стасуецца з рэальным становішчам спраў. Былі б у войску пагалоўна такія аптэчкі, як паказвае міністр аховы здароўя, то і тлуміць сабе галаву не трэба. Проста вынесі на вучэбны пункт, разгарні ды пакажы. Яшчэ і пахваліцца можна — глядзіце, у нас усё ёсць. Але замест гэтага мы бачым паўсатлелыя бінты і хусткі, якія ў выпадку чаго апынуцца ў аптэчках беларускіх вайскоўцаў.