У Барысаве ў маразы пачалі мяняць цеплатрасу (фота)
У ваенным гарадку Печы ў Барысаве з надыходам маразоў мясцовыя цепласеткі заняліся заменай цеплатрас, піша tut.by. У выніку ацяпленне ў кватэрах уключаюць толькі на ноч.
Жыхарка Печаў Наталля распавяла журналістам, што старыя цеплатрасы пачалі мяняць месяц таму. Прычым гэта была не вымушаная мера, а планавыя работы.
"Як нам патлумачылі, толькі месяц таму паступіла фінансаванне і бюджэт трэба асвоіць менавіта сёлета. З 8-й раніцы ацяпленне адключаецца, гарачай вады няма. Пакуль на вуліцы было цёпла, кватэры астывалі не так хутка. Цяпер да моманту ўключэння ацяплення ў 19.00 у пакоях ужо +16. І гэта з улікам таго, што ў мяне маленькае дзіця, таму дадаткова круглыя суткі працуе электраабагравальнік. Учора ацяпленне нам далі толькі да 8-й вечара. Да нармальных 20-21 градусаў кватэра награваецца толькі да 2-й гадзіне ночы. У выхадныя, праўда, працы не вядуцца і ў кватэрах цёпла", — выказвае крыўду жанчына.
Нядаўна на пад'ездах з'явіліся абвесткі, што рамонт цеплатрас плануюць скончыць да 31 снежня. Пры гэтым рабочыя ў гутарцы з жыхарамі назвалі гэтыя тэрміны нерэальнымі і сказалі, што працы скончацца ў лепшым выпадку ў студзені. "Мы тэлефанавалі на гарачую лінію гарвыканкама скардзіцца, дык нам там сказалі, што жыхары гарадка яшчэ павінны сказаць дзякуй за замену цеплатрасы", — распавядае Наталля.
Старшы майстар ЖЭУ-7 Васіль Русакоў паведаміў, што праца ідзе па новым графіку дзяжурстваў, сантэхнікі выходзяць і ноччу, і днём. Ад ацяплення адключаюць не ўвесь гарадок адразу, а часткамі. "Мы робім усё магчымае, каб не пакінуць людзей без цяпла", — дадае спецыяліст.
Тым часам дырэктар барысаўскага прадпрыемства "Жыллё" Дзмітрый Казаноўскі ў каментары БЕЛТА заявіў, што ацяпленне адключаецца на мінімальны час, каб тэмпература ў кватэрах не апускалася ніжэй за 18 градусаў. "Пераўрэзкі займаюць 3-4 гадзіны, дамы не паспяваюць астыць. Кацельня не спыняецца. Работы будуць праводзіцца, пакуль дазволяць ўмовы надвор'я", — заяўляе ён.
Казаноўскі прызнае, што раней замена труб на новыя ішла нізкімі тэмпамі. "Безумоўна, ёсць нязручнасці для грамадзян, але ў далейшым гэта станоўча адаб'ецца на якасці цеплазабеспячэння ўсяго горада", — рапартуе чыноўнік.
