У Беларусь з Літвы не прапусцілі Lamborghini Huracan за 200 тысяч еўра

У Беларусь не прапусцілі Lamborghini Huracan за 200 тысяч еўра, на якім ехаў пенсіянер з Літвы. Ён пераганяў машыну з Германіі, паведамляе vsat.lrv.lt.

У пункце пропуску "Шумскас" літоўскія памежнікі высветлілі, што аўтамабіль знаходзіцца ў базе скрадзеных транспартных сродкаў. Гаспадар паведаміў пра крадзеж 4 красавіка. Адбылося гэта якраз у Германіі.

У дачыненні 66-гадовага жыхара Вільні праводзіцца дасудовае расследаванне. За набыццё ці спробу збыту "маёмасці, атрыманай злачынным шляхам", яму пагражае штраф ці нават пазбаўленне волі на тэрмін да чатырох гадоў. Пакуль жа кіроўцу пасля допыту адпусцілі. Lamborghini знаходзіцца на штрафстаянцы.