У Кіеве лічаць, што РФ плануе прыцягнуць КНДР да вайны супраць Украіны
Ці адправіць дыктатар Кім Чэн Ын сваіх салдат на вайну? / KCNA via REUTERS
У Кіеве лічаць, што РФ плануе прыцягнуць КНДР да вайны супраць Украіны. Украінскі прэзідэнт Уладзімір Зяленскі, які ў панядзелак зрабіў такую заяву, спасылаецца на паведамленні Службы знешняй разведкі і ГУР Мінабароны. Паводле яго слоў, "фактычнае ўключэнне" КНДР у вайну запланаванае Масквой на восень-зіму.
Напярэдадні прэзідэнт Украіны заявіў, што Паўночная Карэя пастаўляе расійскай арміі зброю і асабісты склад, нагадвае hromadske.ua. А Washington Post паведамляла пра тысячы вайскоўцаў з КНДР, якія праходзяць падрыхтоўку ў Расіі і да канца года могуць быць перакінуты на фронт ва Украіну.
"Хоць бы хто дапамагаў Расіі, будзем рэагаваць так жорстка, як трэба для абароны Украіны, — гаворыць у відэазвароце Зяленскі. — Будзе і адпаведная наша праца з партнёрамі, каб расійскія намеры не спрацавалі. І гэта магчыма. Менавіта так і будзе".
Якраз 14 кастрычніка стала вядома, што Уладзімір Пуцін унёс у Дзярждуму РФ праект закона аб ратыфікацыі дамовы аб партнёрстве з КНДР. Яна прадугледжвае стварэнне ваеннага саюза.
