У Латвіі хочуць стварыць міжнародны цэнтр па вяртанні вывезеных з Украіны дзяцей
Сцяг Латвіі / pixabay.com
Парламент Латвіі прапануе стварыць міжнародны цэнтр для вяртання ўкраінскіх дзяцей, незаконна вывезеных у Беларусь і Расію, паведамляецца на сайце парламента.
Дэпутаты асудзілі прымусовы вываз украінскіх дзяцей з акупаваных тэрыторый: "Гэта не проста выкраданне дзяцей. Гэта выкраданне будучыні Украіны".
Таксама латвійскія парламентары падтрымалі расследаванне Міжнароднага крымінальнага суда па выяўленні і судовым пераследзе асоб, адказных за ваенныя злачынствы і злачынствы супраць чалавечнасці на тэрыторыі Украіны.
Дэпутаты заклікалі Міжнародны камітэт Чырвонага Крыжа і спецпрадстаўніка генсакратара ААН па пытаннях гвалту ў дачыненні да дзяцей актыўна падключыцца да развязання гэтага пытання.
