У Лос-Анджэлесе ўручылі ўзнагароды "Грэмі"
Білі Айліш са старэйшым братам Фінеасам О'Конэлам / Reuters
У Лос-Анджэлесе ўручылі ўзнагароды "Грэмі" за найлепшыя песні і альбомы 2022-2023 гадоў. Самая прэстыжная музычная прэмія ўручалася 66-ы раз.
Амерыканская спявачка Білі Айліш атрымала "Грэмі" за найлепшую песню года — за трэк "What Was I Made For?" да фільма "Барбі", паведамляе "Бі-Бі-Сі".
Тэйлар Свіфт атрымала прэмію "Грэмі" за найлепшы альбом года — Midnights. Раней яна атрымлівала гэтую ўзнагароду за альбомы Fearless, 1989 і Folklore. Яна стала першай выканаўцай у гісторыі прэміі, якая атрымала гэтую ўзнагароду чатыры разы. Midnights прызнаны і найлепшым вакальным поп-альбомам. Спявачка анансавала выхад 19 красавіка 2024-га новага альбома — The Tortured Poets Department.
У катэгорыі "Запіс года" ўзнагароджана Майлі Сайрус з кампазіцыяй "Flowers". Яна ж была адзначана за найлепшае сольнае поп-выкананне. У катэгорыі "Найлепшы новы выканаўца" перамагла Вікторыя Манэ.
