Алу Пугачову могуць прызнаць "замежным агентам" да яе юбілею
![Ала Пугачова](/sites/default/files/styles/gallery_main/public/2024-03/1552694549_0_272_2675_1777_1920x0_80_0_0_ff4ba2b446114f05cdc8217a31eb95c3.jpg.webp?itok=X7g8VfxB)
Ала Пугачова / РИА Новости
Народную артыстку СССР Алу Пугачову могуць прызнаць "замежным агентам". І, як пішуць некаторыя расійскія выданні, гэты статус прымадона расійскай эстрады можа атрымаць на свой 75-гадовы юбілей, які адзначыць 15 красавіка.
Днямі стала вядома, што Генпракуратура Расіі накіравала ў Мінюст запыт аб прызнанні Пугачовай "іншаагентам". Мінюст пачаў вывучаць такую магчымасць. Ідзе праверка крыніц фінансавання спявачкі і яе выказванняў. Сваё рашэнне міністэрства агучыць да 12 красавіка.
Ініцыятарам прызнання артысткі "іншаагентам" стаў праўладны актывіст і змагар з карупцыяй Віталь Барадзін. Паводле яго слоў, Ала Пугачова і яе муж Максім Галкін павінны пазбавіцца "маёмасці ў Расіі праз сувязі з замежнымі спецслужбамі".
Муж і жонка пакінулі Расію пасля яе нападу на Украіну. Яны адкрыта асудзілі вайну і падтрымалі ўкраінцаў.
Дарэчы, на канцэрце 29 сакавіка Максім Галкін закрануў тэму прызнання яго жонкі "іншаагентам". "На чарзе дзеці і сабака", — пажартаваў артыст, які ўжо даўно знаходзіцца ў гэтым статусе.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.