Колькі Ap$ent зарабіў на вірусным хіце “Можно я с тобой”

Песня Арсенія Кісляка (Ap$ent) “Можно я с тобой” завірусілася ў ютубе і тыктоку, а таксама трапіла ў топы стрымінгаў Spotify і Apple Music на постсавецкай прасторы. Але пасля таго, як музыка расказаў гісторыю песні (часткова яна — пра палітычныя рэпрэсіі ў Беларусі), яго профілі былі выдаленыя з папулярных расійскіх сэрвісаў.

Ці моцна гэта ўдарыла па яго гаманцы? Увогуле,ці можа беларускі артыст жыць з праслухоўванняў на стрымінгах? А ўсе гэтыя тысячы відэа з трэкамі Ap$ent у тыктоку — яны што-небудзь прыносяць?

Еўрарадыё распытала Кісляка наконт яго заробкаў. А музычны блогер Мікіта Абрамчык расказаў нам, колькі грошай музыка можа “падняць” на стрымінгах.

“Нічога, жыць буду”

— Арсеній, ці канвертуюцца мільёны праслухоўванняў у долары і еўра? 

— Магу пацвердзіць, што вялікая колькасць праслухоўванняў дае плён. Ганарары стрымінг-пляцоўкі плацяць высокія. Якія дакладна — сказаць не магу, камерцыйная таямніца.

Ведаю таксама некалькі артыстаў, якія ў неканцэртных стылях працуюць, тыпу OBLXKQ (вымаўляецца “Воблака”). Яны пішуць музыку, шмат канцэртаў не даюць, зарабляюць за кошт стрымінгаў. Такім чынам можна жыць.

— Ваш каталог выдалілі з VKPlay, а Яндэкс.Музыка заблакавала вашую старонку. Гэта ўдарыла на бізнес-мадэлі?

— Нічога, жыць буду. Вядома, лепш працаваць на ўсіх рынках — расійскім, заходнім, азіяцкім. Але як ёсць, так ёсць.

— Spotify ці Youtube.Music могуць у плане прыбытку замяніць расійскія сэрвісы?

— Канцэрты для мяне — гэта толькі дадатковыя крыніцы заробку. Але музыка можа зарабляць сабе на жыццё па-рознаму. Праз стрымінг, арганізацыю канцэртаў, рэкламныя дамовы, продаж фірмовых рэчаў, платныя калабарацыі з іншымі выканаўцамі. Кожны з гэтых напрамкаў ёсць сэнс пракачваць.

Проста ў кожнага выканаўцы свая схема заробку. Хто больш медыйны — да іх часцей прыходзяць на канцэрты. А ёсць тыя, каго лепей слухаюць прыватна, і вялікія канцэртныя пляцоўкі яны не збіраюць.

— Наколькі сёння складана арганізаваць тур беларускаму выканаўцу-эмігранту?

— Пакуль не ведаю. Калі арганізую, тады і будзе інфармацыя, складана гэта ці не. Але пакуль усё няпроста, бо талковага арганізатара знайсці складана.

Магія лічбаў

Паколькі Ap$ent не стаў раскрываць нават прыблізныя лічбы свайго заробку, мы запыталі ў Мікіты Абрамчыка, стваральніка музычнага блогу “КЛІК”, як выглядае схема манетызацыі творчасці музыкаў. 

“Пытанне манетызацыі вельмі комплекснае. На яго ўплывае велізарная колькасць фактараў: слухаюць па падпісцы ці не, у якой краіне, на якой платформе.

Лічбы для разліку заробкаў ёсць у адкрытым доступе. Важна разумець, што яны суперпрыблізныя, маюць арыентыровачнае значэнне”.

Калі адштурхоўвацца ад дадзеных, што Spotify плаціць выканаўцам па тысячы долараў за 303 030 праслухоўванняў, дык толькі за адну песню “Можно я с тобой” мусілі налічыць больш за $27 тысяч. Але Мікіта Абрамчык заўважае, што “на рукі” артыст, хутчэй за ўсё, атрымае менш — і нашмат. 

“Усё залежыць ад умоваў, на якіх ён заключыў дамову, і як шмат пасярэднікаў паміж ім і стрымінгам існуе. Напрыклад, гэта могуць быць музычныя агрэгатары або лэйблы, дзе на кожным этапе здымаюцца пэўныя ганарары”, — кажа блогер. 

Як і казаў Ap$ent, расійскія стрымінгі, у адрозненні ад заходніх, плацяць музыкам меней грошай. 

“Я лічыў: каб у VKPlay без падпіскі тысячу долараў за стрымы атрымаць, у цябе павінна быць прыблізна 45,5 млн праслухоўванняў. Ведаю, што “СберЗвук” нядрэнна плаціць уладальнікам кантэнту. Але там ніхто музыку не слухае, і ім хоць неяк трэба завабіць на плафторму артыстаў”.