"У паліклініку лепш не ісці": рэпартаж з чаргі па тэсты на COVID-19

Аляксандр Лукашэнка на нарадзе 5 лістапада абурыўся тым, што тэст на каранавірус можна здаваць і ў прыватных лабараторыях. На яго думку, з гэтым трэба разабрацца.

— А то ў нас ужо некаторыя разумнікі закупілі нейкае абсталяванне і пачынаюць шкуру драць з людзей. Псіхоз ствараюць у грамадстве. Яны [людзі. — Еўрарадыё] бягуць у гэтыя лабараторыі, і да 300 рублёў даходзіць адзін тэст. Калі хтосьці з прыватных лабараторый хоча дапамагчы дзяржаве — на дзяржаўных умовах. У вас вось гэты тыдзень — да панядзелка, — каб усё гэта адбудаваць.

Здаць тэст на антыцелы ў Мінску можна ў некалькіх прыватных лабараторыях, але цэны там і блізка не набліжаюцца да 300 рублёў. Звычайна гаворка ідзе пра 20-30. ПЛР-тэст, самы дакладны для вызначэння COVID-19, у Мінску можна здаць толькі ў адной прыватнай лабараторыі — і таксама не за 300, а за 60 рублёў.

Кожны дзень на вуліцы перад медцэнтрам стаіць чарга — мабыць, адна з нямногіх у горадзе, якую не разганяе міліцыя.

Еўрарадыё паразмаўляла з людзьмі, якія хацелі здаць ПЛР-тэст у прыватнай лабараторыі. Іх рэакцыя на словы Лукашэнкі вас (не) здзівіць.

Нават у Афрыцы магчымасцяў здаць тэст больш

Раніца пятніцы. У чарзе два дзясяткі чалавек. Амаль усе ў масках, захоўваюць дыстанцыю.

Юрый стаіць блізка да пачатку. Адразу папярэджвае, што цяпер хварэе, хоць і не ведае, на што менавіта.

— Я не прапісаны ў Мінску. Учора толькі прымацаваўся да паліклінікі, там мне сказалі, што трэба, каб іх доктар прызначыў аналіз... Я ўжо на бальнічным, але мазок у паліклініцы рабіць не хочуць. Не хачу на гэта час марнаваць.

Ідэю Лукашэнкі "ўпарадкаваць" здачу тэстаў у краіне Юрый не падтрымлівае: "Я лічу, што гэта лухта. Трэба, наадварот, усім дазволіць лабараторыям рабіць тэсты".

Юрый, як і пераважная большасць тых, хто стаіць у чарзе, папрасіў сябе не фатаграфаваць: "Ці мала што". У Беларусі восені-2020 яго цалкам можна зразумець.

Крыху далей у чарзе стаяць два турысты, Айша і Махамед. Яны родам з Сьера-Леонэ — афрыканскай краіны, якую аддзяляюць ад Беларусі каля 8 тысяч кіламетраў. Кажуць, што падарожнічалі, цяпер хочуць вярнуцца назад.

— Нам трэба зрабіць тэст, каб дабрацца дадому ў Афрыку. Ляцім з дзвюма перасадкамі назад.

Гэта лабараторыя — адзінае месца ў Мінску, дзе яны могуць здаць ПЛР-тэст на каранавірусную інфекцыю. Пры гэтым Айша і Махамед лічаць цану аналізу занадта высокай, а час чакання вынікаў — занадта доўгім.

— Мы павінны былі вылятаць дзясятага лістапада, але давялося мяняць білеты на 12-е, каб дакладна паспець атрымаць вынікі, — скардзіцца Айша.

У Сьера-Леонэ, па словах турыстаў, ёсць дастаткова месцаў, дзе любы ахвотны можа здаць ПЛР-тэст. І гэта, нагадаем, у афрыканскай краіне, якая па ВУП на душу насельніцтва знаходзіцца ў апошняй дзясятцы.

"Мне нельга размаўляць з журналістамі"

Каля ўвахода ў адну з крамаў ад дажджу хаваецца Жанна.

— Я сябе выдатна адчуваю, але ў мяне бацькі захварэлі. І я кантакт першага ўзроўню. Адпаведна, я сяджу на самаізаляцыі ўжо тыдзень і вырашыла здаць тэст.

Паліклініка, кажа Жана, тэставаць яе не спяшаецца.

— Нават бацькам было складана зрабіць тэст, мы яго "выбівалі" вельмі доўга. Хварэлі ўжо паўтара тыдні, і толькі тады паклікалі яго зрабіць.

Аналіз для Жанны сапраўды задарагі. Але ўчорашніх выказванняў Лукашэнкі яна не слухала — імкнецца апошнім часам ігнараваць яго заявы.

— Але трэба пашыраць магчымасць здачы тэстаў на каранавірус. Я вельмі шмат чула расказаў ад калег, якія спрабавалі здаць тэст. Для ўсіх гэта была вельмі вялікая праблема. Важна знайсці месцы, дзе можна нармальна здаць аналіз.

Жанна кіруе кампаніяй і кожны тыдзень піша справаздачы ў цэнтральны офіс па колькасці хворых. Гледзячы на тое, колькі яе калег хварэе, яна не можа верыць агульным звесткам.

— І часта пішуць дыягназ не той. Яшчэ чула, што тэст кажуць здаваць пазней: праз паўтара-два тыдні пасля з'яўлення сімптомаў, калі чалавек ужо можа ачуняць. Не хочуць псаваць статыстыку, — робіць выснову яна.

Двое хлопцаў, Іван і Антон, прыйшлі здаваць ПЛР з розных прычын.

— Мне трэба вяртацца ў Расію, я сам адтуль. І на працы патрабуюць тэст. Каб не марнаваць час дома, надумаў здаць тут, — тлумачыць Іван.

У Антона іншая прычына: у яго захварэў сусед, пасля чаго з'явіліся першыя сімптомы ВРВІ.

— У паліклініку лепш не ісці рабіць тэст, яны наўрад ці нешта талковае скажуць, — упэўнены малады чалавек.

Абодва хлопцы лічаць няправільным абмяжоўваць магчымасць здачы тэстаў на COVID-19. Статыстыцы Мінздароўя яны таксама не вераць.

— У мяне чатыры сваякі летам памерла ад каранавіруса, — кажа Антон.

У чарзе яны стаяць ужо паўгадзіны, паміж імі і дзвярыма лабараторыі яшчэ чалавек дзесяць. Адзіны плюс: на вуліцу вынеслі анкеты, якія можна запоўніць загадзя, каб не марнаваць час унутры.

Апошні чалавек у чарзе — мужчына сярэдніх гадоў. Анкету ён ужо запоўніў, таму проста стаіць і глядзіць па баках.

— Не, прабачце, — адказвае ён на пытанне пра тое, ці можа адказаць на некалькі пытанняў. — Мне з журналістамі нельга размаўляць.

Людзі працягваюць падыходзіць, нягледзячы на дождж і працоўны дзень, які ўжо пачаўся. Здаюць у гэтай лабараторыі толькі тэсты на каранавірус. І так цэлы дзень.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.