Паліклінікам дазволілі аказваць платныя паслугі ў выходныя дні і святы

Беларускім паліклінікам дазволілі "аказваць па жаданні грамадзян асобныя медыцынскія паслугі ў выхадныя і святочныя дні. Адпаведную пастанову падпісаў прэм'ер-міністр Раман Галоўчанка, паведамляе прэс-служба ўрада.

Таксама пашыраецца дзеючы пералік платных медыцынскіх паслуг. У яго ўключаць самыя папулярныя "медыцынскія ўмяшанні (у асноўным хірургічнага профілю)" і дыягнастычныя даследаванні. Адзначаецца, што ўсе гэтыя паслугі будуць аказваць у дзяржаўных медустановах, "якія маюць неабходную матэрыяльна-тэхнічную базу і кадравы патэнцыял".

Мінздароўя ўдакладняе, што гэтая мера праходзіла эксперыментальную "абкатку" ў 265 установах і паказала добрыя вынікі. 

Спіс платных паслуг, дастуных у выходныя і святочныя дні, папоўняць:
гінекалагічныя, 
уралагічныя,
афтальмалагічныя,
нейрахірургічныя,
отарыналарынгалагічныя,
рэнтгенахірургічныя, 
рэканструктыўныя,
артапедычныя, 
траўматалагічныя, 
сківічна-тварныя, 
агульнахірургічныя, 
практалагічныя, 
эндаскапічныя.

Улады не хаваюць, што такім чынам плануюць стварыць канурэнцыю прыватным медцэнтрам, "якія аказваюць платныя медыцынскія паслугі па высокіх цэнах". Таксама новаўвядзенне, як мяркуецца, дазволіць медыкам павысіць узровень заробкаў і забяспечыць эфектыўнасць выкарыстання медыцынскага абсталявання.

У чэрвені 2022-га Аляксандр Лукашэнка заявіў, што будзе развіваць дзяржаўную сістэму аховы здароўя, бо "прыватнай ён ужо наеўся". У тым жа годзе ў шэрагу прыватных медцэнтраў узніклі праблемы з ліцэнзіямі.