У Шэнгенскую зону прымуць яшчэ тры еўрапейскія краіны
Шэнгенская віза / vivastravel.ru
Паўнавартаснымі чальцамі Шэнгенскай зоны без унутранага памежнага кантролю гатовыя стаць Балгарыя, Румынія і Харватыя. Пра гэта гаворыцца ў заяве Савета ЕС.
Савет заклікае без прамаруджвання прыняць гэтыя краіны ў Шэнгенскую зону. У заяве таксама адзначаецца ўнёсак Балгарыі, Румыніі і Харватыі ў нармальнае функцыянаванне Шэнгенскай зоны, у тым ліку падчас пандэміі ды вайны ва Украіне.
Чакаецца, што 8 снежня Савет юстыцыі і ўнутраных спраў ЕС прагаласуе за поўны ўдзел Балгарыі, Румыніі ды Харватыі ў Шэнгенскай зоне без унутранага памежнага кантролю.
На сёння ў зону Шэнгена ўваходзяць 26 дзяржаў. Гэта ўсе краіны ЕС, акрамя Балгарыі, Харватыі, Кіпра, Ірландыі ды Румыніі. Таксама ў Шэнгенскую зону ўваходзяць Нарвегія, Ісландыя, Швейцарыя і Ліхтэнштэйн, якія не з'яўляюцца чальцамі Еўрасаюза.
