Улады Замбіі даведаліся, што асуджаны ў Расіі іх грамадзянін загінуў ва Украіне
Вайна ва Украіне / https://www.facebook.com/CinCAFU
Улады Замбіі даведаліся, што асуджаны ў Расіі іх грамадзянін загінуў ва Украіне. Як піша "Бі-Бі-Сі", 23-гадовы студэнт Лемехані Натан Ньірэнда адбываў турэмны тэрмін у адной з турмаў на ўскраінах Масквы (за што ён ў красавіку 2020-га атрымаў 9,5 года зняволення, не ўдакладняецца). Па даных МЗС Замбіі, мужчына загінуў "на полі бою" ва Украіне 22 верасня. Яго цела знаходзіцца ў Растове, адкуль чакаецца адпраўка на радзіму.
Вядома, што Ньірэнда да затрымання вывучаў праектаванне ядзерных установак у Маскоўскім інжынерна-фізічным інстытуце.
Урад Замбіі запатрабаваў ад уладаў Расіі "тэрмінова даць інфармацыю пра абставіны, пры якіх замбійскі грамадзянін, які адбываў турэмны тэрмін у Маскве, мог быць завербаваны на вайну ва Украіне і пасля гэтага загінуў". Найхутчэй замежнік быў завербаваны ў шэрагі "вагнераўцаў".
