Джазмен Павел Аракелян знайшоў у базе данос на сябе
Павел Аракелян / Еўрарадыё
У базе даносаў, якую апублікавалі "Кібер-партызаны" джазмен Павел Аракелян знайшоў данос на сябе. Пра гэта музыка распавёў на сваёй старонцы ў Фэйсбуку.
Аўтарам даносу выступіў вядомы арганізатар джазавых вечарын у Мінску Яўген Уладзіміраў. Дата даносу — 18 кастрычніка 2020 года.
"Прашу тэрмінова прыняць законныя меры. Гр-н Аракелян Павел мэтанакіравана заклікае 26 кастрычніка да агульнанацыянальнай забастоўкі, асабіста дапаўняючы злачынны план КР і Ціханоўскай", — гаворыцца ў даносе.
Аўтар паведамлення называе Аракеляна "ілжэдзеячам культуры, так званым джазавым саксафаністам". Уладзіміраў абураецца тым, што Белдзяржфілармонія дазволіла музыку выступаць на дзяржаўнай сцэне.
"Падрыўная правакацыйная дзейнасць Аракеляна ў сацсетках і штовечаровыя выступы ў гарадскіх дварах з мэтай дыскрэдытацыі ўлады і рэжыму злачынныя!" — заяўляе аўтар даносу.
Павел Аракелян пакінуў Беларусь пад канец 2022 года. Перад гэтым ён быў пазбаўлены магчымасці працаваць у краіне і быў вымушаны прадаваць свае інструменты, каб выжыць.
