Увесь алкаголь на борце выпілі за 25 хвілін палёту. Хто гэта зрабіў? — #ІхНоравы

23/04/2024 - 12:46

#ІхНоравы / калаж Улада Рубанава, Еўрарадыё

Дзярждэп ЗША заявіў пра недавер да беларускага ўраду праз бяздзейнасць у плане рэпрэсій. Так-так, не прайшло і чатырох гадоў. І фармулёўка дзіўная. Бо беларускія ўлады яшчэ як дзейнічаюць у плане рэпрэсій. Кожны дзень затрымліваючы і караючы сваіх праціўнікаў.

Але можна паглядзець і інакш: бачыце, Дзярждэп сочыць за тым, што адбываецца ў свеце, і гэтыя падзеі выклікаюць у яго хоць нейкі водгук. Таму мы кожны дзень заклікаем і вас сачыць за падзеямі ў свеце — і хай яны таксама не пакідаюць вас абыякавымі.

Шакавальная лічба

Вы здзівіцеся, наколькі небяспечна быць экаактывістам. Так-так, не палітыкам, не праваабаронцам, не журналістам нават. У 2020 годзе ў свеце былі забітыя 227 экалагічных актывістаў, якія змагаліся за захаванне навакольнага асяроддзя.

Амаль траціна забойстваў была звязаная з тым, што актывісты выступалі супраць эксплуатацыі рэсурсаў. То-бок супраць лесанарыхтовак, здабывання карысных выкапняў, будаўніцтва плацін гідраэлектрастанцый і іншай інфраструктуры.

Паводле звестак арганізацыі Global Witness, з моманту падпісання Парыжскага пагаднення пра змяненне клімату ў 2015 годзе кожны тыдзень у сярэднім забіваюць чатырох экаактывістаў.

Штучны інтэлект і педафілы

І гэта яшчэ не ўся жэсць на гэтую гадзіну.

Педафілы ствараюць выявы аголеных дзяцей з дапамогай штучнага інтэлекту, каб вымагаць у іх грошы, сцвярджае дабрачынная арганізацыя Internet Watch Foundation. Прадстаўнікі арганізацыі знайшлі ў даркнэце падрабязную інструкцыю для злачынцаў.

Ананімны аўтар анлайн-інструкцыі выхваляецца тым, што "паспяхова шантажаваў" 13-гадовых дзяўчынак, прымушаючы іх адпраўляць у сеціва свае аголеныя здымкі.

IWF кажа, што 2023 год быў "самым экстрэмальным за ўсю гісторыю назіранняў". Арганізацыя выявіла больш за 275 тысяч вэб-старонак і выяваў сексуальнага гвалту над дзецьмі.

У Брытаніі, дарэчы, разглядаюць магчымасць забараніць анлайн-інструменты, якія дазваляюць карыстальнікам ствараць выявы людзей без адзення.

Зноў еўрапейскія правыя

Упс, здаецца ў Еўрапарламенце хтосьці шпіёніў на карысць Кітая.

Нямецкія пракуроры арыштавалі чалавека, які працаваў на ультраправага палітыка. Пракуроры сцвярджаюць, што ён перадаў інфармацыю пра Еўрапейскі парламент кітайскай разведцы. Яго таксама падазраюць у шпіянажы за дзеячамі кітайскай апазіцыі ў Германіі.

Міністэрства замежных спраў Кітая кажа, што ўсё гэта спекуляцыя, закліканая "ачарніць і прынізіць Кітай".

У нямецкіх правых усё неяк не вельмі. Вось літаральна нядаўна мы даведаліся, што нямецкага дэпутата ад ультраправай партыі AfD пакараюць за тое, што адкрыў у Беларусі фірму "Цыбулька-Бел". Аказалася, што там ён гадуе на продаж гародніну і бахчавыя. Гэта не забаронена само па сабе, але многім здалося, што... ну неяк няправільна.

А вось што забаронена само па сабе — дык гэта шпіёніць на карысць Кітая.

Сумачкі з кракадзілавай скуры

Амерыканскі суд на 18 месяцаў адправіў у турму вядомую дызайнерку Нэнсі Гансалес. Яе сумачкі з кракадзілавай скуры ёсць нават у Брытні Спірс і Вікторыі Бэкхэм. Дык што здарылася?

Нэнсі прызналі вінаватай у кантрабандзе сумачак з кракадзілавай скуры з яе роднай Калумбіі ў ЗША. Дызайнерка наймала "кур'ераў", якія перад знакавымі мерапрыемствамі накшталт Тыдня моды перавозілі ў Штаты яе сумачкі звычайнымі камерцыйнымі рэйсамі як "падарунак". Гэта парушае закон ЗША пра дзікую прыроду.

У вытворчасці Нэнсі выкарыстоўвала толькі скуры выгадаваных у няволі кайманаў і пітонаў — то-бок усё па законе. Але часам ёй усё ж не ўдавалася атрымаць патрэбныя дазволы ад амерыканскіх органаў, і тады яна звярталася да такой схемы.

Весь алкоголь на борту выпили за 25 минут полёта. Кто это сделал? — #ИхНравы

Сумкі Нэнсі Гансалес / Nancy Gonzalez

Адвакаты дызайнеркі прасілі спагады да яе. Яе гісторыя сапраўды няпростая — гэта цяпер імя Нэнсі Гансалес гучыць побач з такімі гучнымі брэндамі, як Dior, Prada і Gucci. А пачынала яна як разведзеная маці-адзіночка з двума дзецьмі, якая шыла рамяні для сяброў на хатняй швейнай машынцы.

Да таго ж 71-гадовая дызайнерка ўжо дорага заплаціла за свае парушэнні. Створаная ёю калумбійская кампанія, у якой калісьці працавала 300 супрацоўнікаў, абвясціла пра банкруцтва і спыніла дзейнасць пасля яе арышту.

Сама Нэнсі ў судзе сказала, што глыбока шкадуе пра тое, што не выконвала законы ЗША, і не хацела пакрыўдзіць краіну. І што яе адзінае жаданне — яшчэ раз абняць сваю 103-гадовую маці.

Вам курыцу, рыбу ці піва?

Да нармальных навін. Ляцела неяк у Турцыю кампанія спартоўцаў. І па дарозе выпіла ўвесь алкаголь на борце. Адгадайце, пра якіх турыстаў гаворка!

А вось і не, пра брытанскіх! Авіякампанія SunExpress везла ў Турцыю гульцоў у гольф. І экіпаж карабля быў трохі здзіўлены, калі праз 25 хвілін пасля ўзлёту бар апусцеў.

"Піва і віно скончыліся праз 25 хвілін! Такога не бывала ні на адным іншым рэйсе", — кажа выканаўчы дырэктар авіякампаніі.

Але гэта яны, вядома, яшчэ не ўсюды лёталі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.