Вірусны эфект: жодзінскіх "сутачнікаў" адпраўляюць лячыцца ад COVID-19 у Польшчы

Паводле звестак праваабарончага цэнтра "Вясна", толькі ў лістападзе ў Беларусі было арыштавана 1615 чалавек. У суме яны правялі (і праводзяць) за кратамі 20 550 сутак.

Тыя, хто выходзіць з ізалятараў, кажуць, што там зроблена ўсё, каб як мага больш людзей заразіліся COVID-19.

Еўрарадыё пагутарыла пра гэта з журналістам "Радыё Свабода" Ігарам Карнеем, які быў затрыманы 15 лістапада і правёў 10 сутак у следчым ізалятары ў Жодзіне. У праграме "Вірусны эфект" ён пацвердзіў, што месцы ўтрымання зняволеных пад вартай — сапраўдны рассаднік COVID-19. У невялікіх камерах — па 20 чалавек. На ўсіх — чатыры кубкі. А калі чалавеку зусім дрэнна і ён звярнуўся па дапамогу, супрацоўнікі ізалятара могуць адказаць: "Гэта вам не Польшча!"

Upd. Пасля выхаду нашай праграмы Ігар Карней паведаміў, што ў яго пацвердзіўся каранавірус.

"Вірусны эфект" — праграма, у якой Еўрарадыё пераасэнсоўвае, як змянілася і працягвае змяняцца наша жыццё пад уздзеяннем пандэміі. Чаму рана святкаваць перамогу, разважаюць нашы госці: урачы, музыканты, рэстаратары, рабочыя, кіроўцы, мастакі, арганізатары канцэртаў і фестываляў, уладальнікі клубаў, настаўнікі і іншыя.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.