За тры дні за мяжу выехалі каля 11 тысяч беларусаў

За тры дні за мяжу выехалі каля 11 тысяч беларусаў, паведамляе mfa.gov.by. Яны праігнаравалі рэкамендацыі МЗС Беларусі і не ўстрымаліся ад замежных паездак, нягледзячы на распаўсюд каранавіруса. Знешнепалітычнае ведамства ў чацвер зноў звярнулася да грамадзян і рэкамендуе "без асаблівай неабходнасці" пакуль не планаваць паездак за мяжу, паколькі пасля ўзнікнуць "відавочныя цяжкасці" з вяртаннем на радзіму. Таму тыя, хто ўсё роўна выязджае ў замежжа, мусяць усведамляць, што робяць гэта "на свой страх і рызыку".

З-за таго, што і краіны ЕС, і Расія закрылі межы для замежнікаў, узнікла праблема вяртання беларусаў на Бацькаўшчыну. Ёй займаецца МЗС і дыппрадстаўніцтвы па ўсім свеце. Ужо аказаная дапамога па вяртанні больш за 2500 нашых грамадзян. І такая праца працягваецца. Больш за тое, Аляксандр Лукашэнка даручыў дапамагчы расіянам выехаць з Польшчы і вярнуцца ў РФ. І гэтая праблема вырашаецца.

Чакаецца, што раніцай 20 сакавіка з маскоўскага аэрапорта Унукава ў Беларусь на самалёце "Белавія" вылеціць група нашых грамадзян. Іх там каля 100, у тым ліку дзеці.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.