Замежны студэнт выкраў у сябра больш за 74 тысячы долараў ЗША

31 снежня 2019 года ў Савецкае РУУС Мінска звярнуўся 20-гадовы замежны студэнт. Ён паведаміў, што яго сябар, які пражываў з ім у інтэрнаце, выкраў у яго больш за 74 тысячы долараў ЗША.

Напярэдадні Новага года заяўнік папрасіў прыяцеля падвезці яго ў банк і дапамагчы атрымаць грашовы перавод на набыццё кватэры. Паводле яго слоў, самастойна ён гэтага зрабіць не мог з-за праблем з веданнем мовы. На зваротным шляху той прапанаваў схаваць грошы ў бардачок машыны для захаванасці. Калі хлопец так зрабіў, кіроўца пад выдуманай падставай папрасіў пасажыра выйсці з машыны, пасля чаго схаваўся ў невядомым кірунку.

Неўзабаве яго затрымала міліцыя.

Па дадзеных МУС і Следчага камітэта Беларусі, 21-гадовы выкрадальнік схаваў грошы ў лесе. Ён распавёў, што збіраўся траціць іх на дзяўчат, казіно і набыццё новай машыны.

Хлопца абвінавачваюць па частцы 4 артыкула 206 КК Беларусі (рабаванне ў асабліва буйным памеры). На яго маёмасць накладзены арышт на агульны кошт больш за 30 тысяч рублёў, а сам абвінавачаны заключаны пад варту.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.