Рапухі, якія забіваюць кракадзілаў, і сабачкі з вокладкі Vogue — #ІхНоравы

16/08/2024 - 16:52

Замежныя навіны / @rubanau_collage

Неверагодна, але факт! За тры гады рапухі атруцілі амаль палову кракадзілаў на поўначы Аўстраліі. Навукоўцы ўжо прыдумалі, як з гэтым змагацца, але колькі кракадзілавых слёз пральецца падчас гэтай няроўнай барацьбы, невядома.

Тым часам Vogue запускае новы праект, прысвечаны сабачкам у свеце моды. Некаторыя з іх ужо паспелі мільгануць на вокладках знакамітага часопіса.

Пра тое, які дыван расквітнеў у цэнтры сталіцы Бельгіі, а таксама пра тое, хто падставіў зорку серыяла “Сябры”, акцёра Мэцью Пэры — чытайце ў нашай традыцыйнай рубрыцы "Іх норавы".

Наркотыкі для Мэцью Пэры

Паліцыя ЗША затрымала доктара і наркадылераў. Іх падазраюць у пастаўцы кетаміну амерыканскаму акцёру Мэцью Пэры.

Каб выявіць дакладныя шляхі паставак рэчыва, у падазраваных канфіскавалі тэхніку. Паводле звестак рэдакцыі TMZ, у перапісцы акцёр абмяркоўваў умовы і кошт дастаўкі прэпарату.

Нагадаем, што Пэры атрымліваў кетамін пад назіраннем медыкаў. Так акцёр спрабаваў справіцца з дэпрэсіяй і трывожнасцю. Аднак памёр ён праз паўтара тыдня пасля завяршэння курса тэрапіі, што і выклікала падазрэнні ў следства. У дзень смерці канцэнтрацыя кетаміну ў арганізме акцёра адпавядала дозе для агульнай анестэзіі.

Мэцью Пэры памёр 28 кастрычніка 2023 года ва ўзросце 54 гадоў. Яго цела знайшлі ў джакузі дома. Слядоў наркотыкаў на месцы здарэння паліцыя не выявіла.

Рапухі, якія забіваюць кракадзілаў

Прэснаводныя кракадзілы любяць паляваць на рапуху-а́гу, ад чаго масава паміраюць, бо скура такога “пачастунку” вельмі атрутная. Яшчэ ў канцы 2000-х паведамлялася, што на паўночнай тэрыторыі Аўстраліі літаральна за 2-3 гады ад яду гэтых рапух вымерла ледзь не палова кракадзілаў.

Аўстралійскія навукоўцы знайшлі эфектыўнае вырашэнне гэтай праблемы. У тушкі мёртвых земнаводных яны ўпырскваюць рэчыва, якое выклікае ў кракадзілаў млоснасць. Такім чынам драпежнікаў адвучваюць ад смачнай здабычы.

— Эксперымент цалкам спыніў смяротнасць кракадзілаў у тых раёнах, дзе рапухі нядаўна з'явіліся, і на 95% скараціў яе нават там, дзе кракадзілы ўжо некалькі гадоў палявалі на рапух, — сцвярджае галоўная даследчыца ў гэтай праграме Джорджыя Уорд-Фір з Універсітэта Макуоры.

Сабачкі з вокладкі Vogue

Часопіс Vogue прадставіў новы анлайн-праект Dogue пра гісторыю сабак у свеце моды. Выданне апублікавала вокладкі з выявамі 12 гадаванцаў знакамітасцяў. Сярод іх чыхуахуа Дэмі Мур, дудлі Ганны Вінтур, пітбуль Білі Айліш і пудзель Сіяры.