Жыхары Жлобіна тры месяцы друкавалі грошы на прынтары

Гомельскія міліцыянеры кажуць, што затрымалі фальшываманетчыкаў-аматараў. На банкнотах іх вытворчасці не было нават імітацыі элементаў абароны. Купюры мужчыны друкавалі на прынтары, але пры гэтым не скнарнічалі — абмежаваліся банкнотамі маленькага наміналу (5, 10 і 20 рублёў). І таму, напэўна, іх не адразу пачалі шукаць.

Пра ўзнікненне ў Жлобіне альтэрнатыўнага "эмісійнага цэнтра" сілавікі пачалі здагадвацца, калі ім пасыпаліся скаргі на падробленыя банкноты з мясцовых банкаў. Фальшываманетчыкаў знайшлі. Імі аказаліся двое мясцовых жыхароў 39-ці гадоў. Пры ператрусе дома ў аднаго з іх знайшлі 40 аналагічных банкнот. "Іх друкавалі на звычайнай паперы з дапамогай офіснага прынтара", — расказалі ў Гомельскім УУС. Мужчыны прызналіся, што друкавалі "грошы" каля трох месяцаў. Заведзеная крымінальная справа.