ЗША выступаюць за абмежаванне ўдзелу Беларусі і Расіі ў спартыўных спаборніцтвах
Беларускі і расійскі спорт пад санкцыямі / Ілюстрацыйнае фота pixabay.com
ЗША выступаюць за абмежаванне ўдзелу Беларусі і Расіі ў спартыўных спаборніцтвах. У тым ліку і на алімпійскіх. Прэс-сакратар Белага дома Карын Жан-П'ер заявіла, што Злучаныя Штаты — за захаванне забароны на сцягі, гербы і гімны Беларусі і Расіі на міжнародных спаборніцтвах.
"У выпадках, калі спартыўныя арганізацыі і арганізатары спартыўных мерапрыемстваў, такія як Міжнародны алімпійскі камітэт, вырашаюць дапусціць да ўдзелу атлетаў з Расіі і Беларусі, павінна быць абсалютна ясна, што яны не прадстаўляюць расійскай або беларускай дзяржаў", — сказала Жан П'ер.
Тым часам міністры спорту Літвы, Латвіі, Эстоніі і Польшчы заклікалі Міжнародны алімпійскі камітэт не пускаць спартсменаў з Беларусі і Расіі на Алімпіяду 2024 года. Прычына — вайна ва Украіне.
Міжнародны алімпійскі камітэт заявіў, што працягваць поўнае адхіленне беларусаў і расіян ад міжнародных спаборніцтваў не дазваляе пазіцыя ААН наконт "дыскрымінацыі па нацыянальнай прыкмеце", а таксама "прынцыпы алімпійскага руху". Пры гэтым пакуль гаворкі пра допуск беларусаў і расіян да Алімпіяды 2024 года няма.
