Зяленскі звольніў усіх абласных ваенкамаў
![Уладзімір Зяленскі / афіцыйны тэлеграм-канал прэзідэнта Украіны](/sites/default/files/styles/gallery_main/public/2023-08/photo_2023-08-17_10-44-42.jpg.webp?itok=ruVFODLL)
Уладзімір Зяленскі / афіцыйны тэлеграм-канал прэзідэнта Украіны
Прэзідэнт Украіны Уладзімір Зяленскі падпісаў указ, якім звольніў усіх абласных ваенкамаў, піша "Суспільне".
"Увесці ў дзеянне пастанову Рады нацыянальнай бяспекі і абароны Украіны ад 11 жніўня 2023 года "Пра вынікі праверкі тэрытарыяльных цэнтраў камплектавання і сацыяльнай падтрымкі Узброеных сіл Украіны", — гаворыцца ва ўказе.
Тыдзень таму на пасяджэнні Рады нацыянальнай бяспекі і абароны Зяленскі заслухаў даклады па выніках праверкі ваенкаматаў. "Усяго ўжо 112 крымінальных спраў у дачыненні да службовых асоб "ваенкаматаў", 33 падазрэнні", — пракаментаваў вынікі праверкі ўкраінскі прэзідэнт.
Ён загадаў прызначаць кіраўнікамі ваенкаматаў ваяроў, якія страцілі здароўе ў баях:
"Кіраваць гэтай сістэмай мусяць людзі, якія дакладна ведаюць, што такое вайна і чаму цынізм і хабарніцтва падчас вайны — гэта дзяржаўная здрада. Затое ваяры, якія прайшлі фронт ці не могуць быць у акопах, бо страцілі здароўе, страцілі канечнасці, але захавалі сваю годнасць і не маюць цынізму, — менавіта ім можна даверыць гэтую сістэму камплектавання".
Займацца прызначэннем будзе галоўнакамандуючы Валерый Залужны. Перад прызначэннем новых кіраўнікоў ваенкаматаў іх праверыць СБУ.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.