Аднаполыя шлюбы ў Грэцыі і секс-скандал з Calvin Klein — #ІхНоравы

12/01/2024 - 15:20

Замежныя навіны / @rubanau_collage

Дэпутаты і вернікі Грэцыі перашкаджаюць свайму прэм'ер-міністру легалізаваць аднаполыя шлюбы. Тым часам брытанцы абвінавачваюць Calvin Klein у тым, што кампанія размясціла на сваім постэры "стэрэатыпны сексуальны аб'ект".

Чым яшчэ ўзбуджаны свет і якія скарбы раскапалі археолагі пад Каірам — чытайце ў традыцыйнай рубрыцы Еўрарадыё "Іх Норавы".

Прэм'ер-міністру Грэцыі перашкаджаюць легалізаваць аднаполыя шлюбы

Прэм'ер-міністр Грэцыі Кірыякас Міцатакіс сутыкнуўся з жорсткай крытыкай свайго абяцання легалізаваць аднаполыя шлюбы. Дэпутаты ва ўласным кабінеце палітыка выступаюць супраць гэтага кроку, а ўплывовая праваслаўная царква баіцца, што гэта можа прывесці да дэмантажу грамадства.

Міцатакіс прызнаў, што яму давядзецца выкарыстоўваць свае навыкі пераканання, каб правесці рэформу, паколькі ўнутры яго правацэнтрысцкай партыі "Новая дэмакратыя" расце апазіцыя.

— Я і ўсе тыя, хто верыць у гэты закон, павінны пераканаць нашых парламентарыяў, а пасля і тых, хто ўсё яшчэ можа мець негатыўную пазіцыю. Мы збіраемся прыняць закон аб роўнасці ў шлюбе, што азначае ліквідацыю любой дыскрымінацыі па прыкмеце сексуальнай арыентацыі. Гэта не нешта радыкальна адрознае ад таго, што ўжываецца ў іншых еўрапейскіх краінах.

Calvin Klein абвінавацілі ў аб'ектывацыі

Брытанскі рэгулятар забараніў рэкламны плакат кампаніі Calvin Klein, на якім спявачка FKA twigs (пад гэтым псеўданімам выступае Талія Барнэт) стаіць у адной толькі джынсавай кашулі. На думку Упраўлення па стандартах рэкламы (ASA), постар можа абразіць людзей, паколькі аб'ектывуе жанчын.

ASA паведаміла, што атрымала ад жыхароў краіны некалькі скаргаў і заключыла, што на плакаце FKA twigs паўстае як "стэрэатыпны сексуальны аб'ект".

Але сама спявачка з такой ацэнкай не пагадзілася.

— Я тут не бачу ніякага “стэрэатыпнага сексуальнага аб'екта”, як яны мяне ахрысцілі. Я бачу цудоўную, моцную жанчыну, чыё неверагоднае цела здолела перамагчы такі боль, які вы нават не можаце сабе ўявіць. У святле іншых рэкламных кампаній такога кшталту, мінулых і сёлетніх, не магу не адзначыць, што тут відавочна мае месца выкарыстанне падвойных стандартаў.

Дэменцыя і інсульты могуць быць звязаныя з забруджваннем паветра

Расце колькасць доказаў сувязі забруджвання паветра з дэменцыяй і рызыкай інсульту. Доўгатэрміновае даследаванне ў Вялікабрытаніі дапаўняе аб'ём даследаванняў, якія звязваюць забруджвальныя рэчывы з пагаршэннем здароўя мозгу.

Падчас даследавання было вывучанае здароўе больш за 413 000 чалавек, якія прынялі ўдзел у праекце Брытанскага біябанка. На пачатку даследавання ўсім было ад 40 да 69 гадоў, і ў іх не было дэменцыі, рака ці інсульту.

Іх здароўе адсочвалі, надаючы асаблівую ўвагу сувязі паміж забруджваннем паветра і пераходам ад здароўя да інсульту, дэменцыі ці таго і іншага. Таксама былі сабраныя звесткі пра лад жыцця ўдзельнікаў, уключаючы курэнне, фізічныя практыкаванні, ужыванне алкаголю і дыету, а таксама пра іх сацыяльна-эканамічны статус.

За 11 гадоў у 6 484 чалавек здарыўся інсульт, у 3 813 развілася дэменцыя і ў 376 здарыўся інсульт і развілася дэменцыя. Прыняўшы да ўвагі іншыя фактары рызыкі, навукоўцы выявілі сувязь паміж працяглым уздзеяннем забруджвання паветра і развіццём дэменцыі, а таксама развіццём дэменцыі пасля інсульту.

Інсульт з'яўляецца другой па ліку прычынай, якая выклікае смерць у свеце. На яго долю прыпадае каля 11% смерцяў. Каля 50 мільёнаў чалавек жывуць з дэменцыяй, і чакаецца, што да 2050 года гэтая лічба вырасце прыкладна да 150 мільёнаў.

Археолагі раскапалі старажытную егіпецкую грабніцу са скарбамі

У некропалі Сакара, які размешчаны за 25 кіламетраў на поўдзень ад Каіра, археолагі зрабілі рэвалюцыйнае адкрыццё. Яны выявілі старажытную егіпецкую грабніцу, якая была высечаная ў скале больш за 4000 гады таму.

Грабніца змяшчае мноства магіл і артэфактаў, якія адносяцца да розных гістарычных перыядаў. Па словах спецыялістаў, рэдкая знаходка дае бясцэннае ўяўленне пра гісторыю рэгіёну, у якім яе знайшлі.