Адвакат: прыпыненне расследавання па факце смерці Бандарэнкі выклікае здзіўленне

Родныя Рамана Бандарэнкі нічога не ведалі пра прыпыненне расследавання. Яго маці Алена Бандарэнка абураная: "Ёсць злачынства, ёсць сведкі, відэа- і аўдыёматэрыялы, а вінаватага ў XXI стагоддзі высокіх тэхналогій у цэнтры сталіцы ўстанавіць не ўдалося?!".

31-гадовы Раман Бандарэнка быў затрыманы ўвечары 11 лістапада 2020 года ў дварах каля Плошчы Перамен у Мінску. Яго завезлі ў міліцыю, а адтуль — у бальніцу, дзе на наступны дзень ён памёр. Былыя беларускія сілавікі даўно апублікавалі ў інтэрнэце сваё расследаванне, у якім назвалі падазраваных у збіцці і затрыманні Бандарэнкі.

Крымінальную справу па факце смерці пратэстоўца Генпракуратура распачала толькі ў лютым 2021 года.

Журналістку Кацярыну Барысевіч асудзілі на шэсць месяцаў пазбаўлення волі і штраф, а лекара Арцёма Сарокіна — на два гады калоніі з адтэрміноўкай пакарання на год за тое, што яны абнародавалі інфармацыю: забіты Раман Бандарэнка не быў п'яным — 0 праміле алкаголю ў крыві. А гэта супярэчыла афіцыйным заявам.