У Вільні праходзіць вялікая акцыя памяці Рамана Бандарэнкі
Акцыя памяці Рамана Бандарэнкі / ОСЦ
У Вільні праходзіць вялікая акцыя памяці Рамана Бандарэнкі і ўсіх людзей, якіх закатаваў рэжым Лукашэнкі. У ёй прымае ўдзел лідарка беларускіх дэмсілаў Святлана Ціханоўская.
Яна выступіла з прамовай, падчас якой нагадала пра ахвяраў рэжыму і падзякавала ўсім беларусам, якія працягваюць змагацца:
"«Я выходжу», — такімі былі апошнія словы Рамана Бандарэнкі. Ён выйшаў, каб абараніць нашыя сімвалы. Каб спыніць гвалт дыктатуры. Каб мы з вамі маглі жыць у свабоднай краіне.
Раману быў толькі 31 год. Ён ахвяраваў сваё маладое жыццё для нас з вамі. Ён стаў беларускім героем — як і многія іншыя беларусы. Іх ахвяры былі не дарэмныя.
Пакуль гвалт дыктатуры не спынены, мы з вамі будзем працягваць выходзіць!"
Жыхар Плошчы Пераменаў Раман Бандарэнка быў забіты ўночы на 12 лістапада 2020 года. Тады на плошчу прыехаў мікрааўтобус з прыхільнікамі Лукашэнкі, якія збіраліся зрэзаць з агароджы белыя і чырвоныя стужачкі. Бандарэнка выйшаў абараніць іх. Тады яго збілі — як высветлілася, да смерці.
Шмат што ўказвае, што сярод лукашыстаў, якія ў той вечар прыехалі на Плошчу Пераменаў, быў хакейны трэнер (а сёння член Савета Рэспублікі) Дзмітрый Баскаў і прэс-сакратарка Лукашэнкі Наталля Эйсмант.
