Агрэсіўны бабёр тры дні тэрарызаваў жыхароў пасёлка ў Бабруйскім раёне

Жыхароў вёскі Глуша ў Бабруйскім раёне тры дні тэрарызаваў бабёр. Дзікая жывёла шыпела, кідалася на навакольных і не пакідала ўскраіну пасёлка, піша komkur. info.

Жыхары паскардзіліся ў райвыканкам, а чыноўнікі затэлефанавалі ў лясгас. На месца выехаў ляснічы Ілля Дудаль.

Па яго словах, гэта быў малады бабёр. Верагодна, звер шукаў новае месца для жыцця, таму і зайшоў на ўскраіну пасёлка. Выгнаць яго мясцовыя жыхары не здолелі. Бабры вельмі небяспечныя і могуць нанесці зубамі сур'ёзныя раны.

Ляснічы накрыў бабра дзіцячай ванначкай, потым прасунуў пад ніз ліст бляхі. У такой закрытай пастцы жывёлу пагрузілі ў машыну і перавезлі да бліжэйшай рэчкі.