Бацькі дзяцей, што атруціліся ў мінскай школе, напісалі зварот да дырэктара
Бацькі пацярпелых школьнікаў прыйшлі даведацца, што адбылося з іх дзецьмі / rebenok.by
У бацькоў дзяцей з мінскай школы №61 назапасіліся пытанні ў сувязі з сітуацыяй, якая ўзнікла ў мінулую пятніцу пасля таго, як іх дзеці паелі ў школьнай сталоўцы. Пасля абеду з гэтай школы ў дзіцячую інфекцыйную бальніцу забралі каля 20 чалавек. А ўсяго па дапамогу да медыкаў, па дадзеных гарадскіх уладаў, звярнуліся 174 дзіцяці. Была ўзбуджаная крымінальная справа і створана камісія, якая разбіраецца ў тым, што адбылося. У школе, тым часам, працягвае працаваць сталовая, а дзецям, якія прыносяць ежу з сабой, не дазваляюць яе есці.
З пытаннямі, што ўсё ж такі адбылося і чаму дзецям нельга браць ежу з хаты, да дырэктара школы напярэдадні вечарам прыйшлі некалькі дзясяткаў бацькоў, распавядае партал Rebenok.by
"Пяты дзень у няведанні ... Як так можна? Хоць бы папрасілі прабачэння ... Школу трэба было зачыніць да высвятлення прычын", — казалі бацькі.
Пасля выпіскі дзяцей з інфекцыйнай бальніцы на руках у бацькоў апынуліся эпікрызы з рознымі дыягназамі: адным паставілі "востры гастрыт", іншым сказалі пра бактэрыяльную інфекцыю.
Сустрэча з дырэктарам не адбылася, нягледзячы на тое, што ў сераду ў Ірыны Цубікавай быў прыёмны дзень. Яна сказала, што гатова выслухаць бацькоў па адным. Тыя адмовіліся. Тады да бацькоў выйшла намеснік дырэктара Вольга Гаранкова. Яна сказала, што ідзе расследаванне, і што супрацоўнікі школы робяць усё, што ў іх сілах. На пытанне пра хатнюю ежу, намеснік дырэктара сказала, што браць з сабой яе можна, але есці толькі ў класе. Прыходзіць у сталовую са сваімі прадуктамі нельга.
Не дачакаўшыся выразных адказаў на пытанні, бацькі аформілі іх на паперы. Пад зваротам падпісаліся каля 40 чалавек. Аналагічны зварот яны плануюць перадаць і ў Міністэрства адукацыі.
У аўторак 24 лістапада Міністэрства аховы здароўя паведамляла, што ў дзіцячай інфекцыйнай бальніцы застаюцца двое дзяцей з сярэдняй школы №61. Працуе спецыяльная камісія, якая высвятляе прычыны таго, што адбылося.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
