Багінскую будуць судзіць за бел-чырвона-белы сцяг на тумбачцы ў кватэры
Ніна Багінская / Euroradio
Ніну Багінскую будуць судзіць за бел-чырвона-белы сцяг на тумбачцы ў кватэры, паведамляе "Белсат". Міліцыянеры прыйшлі да вядомай актывісткі на Дзень Волі. Іх задачай было не дапусціць, каб Багінская яго адзначыла выхадам са сцягам на вуліцу. Яе завезлі ў міліцыю і трымалі там да вечара.
Адміністрацыйную справу разгледзіць суд Першамайскага раёна Мінска.
Ніне Багінскай 77 гадоў. Яна — адзін з сімвалаў беларускіх пратэстаў, прыклад нязломнасці і непахіснасці. Яна ўдзельнічае ў апазіцыйным руху яшчэ з часоў СССР. За гэтыя дзесяцігоддзі яе дзясяткі разоў затрымлівалі. У кастрычніку 2020-га Аляксандр Лукашэнка назваў Ніну Багінскую перакананым чалавекам і загадаў "не забіраць яе з плошчаў". Але яе ўсё роўна затрымлівалі сілавікі. У 2022-м ёй забаранілі выязджаць з Беларусі.
