Баку і Ерэван дамовіліся аб спыненні агню ў Нагорным Карабаху

10 кастрычніка Арменія і Азербайджан дамовіліся аб спыненні агню ў Нагорным Карабаху. З 12:00 у суботу рашэнне павінна ўступіць у сілу, заявіў міністр замежных спраў Расіі Сяргей Лаўроў.

Бакі пагадзіліся спыніць агонь, каб абмяняцца ваеннапалоннымі і іншымі ўтрыманымі асобамі, целамі загінулых пры пасярэдніцтве і ў адпаведнасці з нормамі міжнароднага чырвонага крыжа.

Як паведамляе BBC, пагадненне было заключана пасля перамоваў у Маскве міністраў замежных спраў Арменіі і Азербайджана Зограба Мнацаканяна і Джейхуна Байрамава.

Сустрэча палітыкаў праходзіла ў закрытым фармаце пры пасярэдніцтве кіраўніка расійскага МЗС Сяргея Лаўрова. Перамовы доўжыліся больш за 10 гадзін і скончыліся глыбокай ноччу.

Цяпер Баку і Ерэван пры пасярэдніцтве сустаршыняў Менскай групы АБСЕ прыступаюць да субстантыўных перамоваў з мэтай хутчэйшага дасягнення мірнага ўрэгулявання канфлікту.

Вайна ў Нагорным Карабаху пачалася 27 верасня. Баі паміж Арменіяй і Азербайджанам праходзяць на некалькіх участках фронта. Ахвярамі абстрэлаў становяцца мірныя жыхары па абодва бакі фронту.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.