Банк развіцця зноў не змог расплаціцца з трымальнікамі беларускіх еўрабондаў

Трымальнікі беларускіх еўрааблігацый зноў не змаглі атрымаць належных выплатаў. Чарговая дата пагашэння па еўрааблігацыях ААТ "Банк развіцця Рэспублікі Беларусь" на суму паўмільярда долараў ЗША наступіла 2 траўня. У гэтай сувязі Банк развіцця звярнуўся да ўладальнікаў еўрабондаў і нагадаў, што не можа перавесці грошы праз санкцыі.

Праз "недружалюбныя дзеянні шэрагу замежных дзяржаваў у дачыненні да Рэспублікі Беларусь і Банка развіцця (якія пацягнулі за сабой, сярод іншага, закрыццё карэспандэнцкіх рахункаў у доларах ЗША і адключэнне ад сістэмы SWIFT), у Банка развіцця адсутнічае тэхнічная магчымасць накіраваць сумы асноўнага доўгу і назапашанага працэнтнага даходу з датамі выплаты 02.05.2023, 02.11.2023, 02.05.2024 на карысць плацежнага агента (Citibank, N. A., London Branch)", гаворыцца ў паведамленні банка.

У банку таксама паведамілі, што пакуль рэзервуюць на адпаведных рахунках сумы асноўнага доўгу і назапашаныя працэнты. Гаворка пра выплаты за апошнія паўтара года (02.05.2023, 02.11.2023 і 02.05.2024). Мяркуецца, што ў перспектыве ўладальнікі беларускіх еўрабондаў змогуць забраць свае грошы. Гэта адбудзецца альбо калі адменяць санкцыі, альбо "пасля зацверджання адпаведнага нарматыўнага прававога акта (праект праходзіць унутрыдзяржаўнае ўзгадненне)".

Нагадаем: раней расійскія трымальнікі беларускіх еўрааблігацый, які засталіся без належных выплатаў, прасілі ўлады сваёй краіны абмежаваць крэдытаванне Беларусі, а таксама пагражалі звярнуцца ў міжнародны трацейскі суд у Лондане, калі Мінск не пагасіць абавязацельствы.