"Барселона" выйграла ў "Атлетыка", "Баварыя" перамагла "Бенфіку"

У аўторак, 5 красавіка, прайшлі першыя чвэрцьфінальныя матчы футбольнай Лігі чэмпіёнаў. "Барселона" перамагла мадрыдскі "Атлетыка" — 2:1. Фернанда Торэс адкрыў лік на 25-й хвіліне, аднак праз 10 хвілін, пасля двух жоўтых картак, ён быў выдалены з поля. Гэта перадвырашыла вынік матчу: "Атлетыка" не доўга пратрымаўся ў меншасці.

У пачатку другога тайма некалькі разоў небяспечна біў Неймар, адзін раз трапіў у перакладзіну. "Барса" цалкам узяла гульню пад кантроль і прыціснула гасцей да іх брамы. І вырвала перамогу: два галы забіў Луіс Суарэс на 63-й і 74-й хвілінах.

"Баварыя" выйграла ў "Бенфікі" — 1:0. Адзіны гол забіў Артура Відаль на 2-й хвіліне.

Матчы ў адказ адбудуцца 13 красавіка.

6 красавіка згуляюць "Вольфсбург" і "Рэал", ПСЖ і "Манчэстар Сіці".